Jas kásipker týǵan aýylyn kórkeıtý josparymen bólisti

ASTANA. QazAqparat - Elbasy Nursultan Nazarbaevtyń Jastar jylynyń ashylýynda sóılegen sózi jastardy qanattandyrdy. Mundaı pikirdi «Nazarbaev Ýnıversıtetinde» ótip jatqan Self-made forýmynda aýyl sharýashylyǵy salasynyń jas kásipkeri Dálel Júzbaev bildirdi, dep habarlaıdy QazAqparat tilshisi.

«Elbasy jarııalaǵan baǵdarlamalardyń jemisin kórip júrmin desem artyq aıtqandyq emes. «Bolashaq» baǵdarlamasymen AQSh-ta bilim aldym. Al búginde «Dıplommen aýylǵa» baǵdarlamasy arqyly týǵan jerimde agrobıznespen aınalysyp jatyrmyn. 2015 jyly ákem ómirden ozyp, sharýashylyq tizginin qolyma alýǵa týra keldi. Jalpy, oǵan deıin Astanadaǵy ulttyq kompanııalardyń birinde jumys istep júrgen edim. Búginde aýylda agrobıznesti tabysty júzege asyrýdamyn», - dedi ol.

Jas kásipker aýyl sharýashylyǵymen aınalysýdyń qıynshylyǵy da bar ekendigin, degenmen ózine unaıtyndyǵyn atap ótti. Sonymen qatar aldaǵy ýaqyttaǵy josparymen bólisti.

«Aqmola oblysynyń Qorǵaljyn aýdanynda dándi-daqyldar ósirýimen aınalysamyz. Bıyl 15 myń gektar alqapqa bıdaı men arpa sebý josparymyzda bar. Kásiporynymyzda 60-tan astam adam jumys isteıdi, olar ortasha eseppen 120 myń teńge jalaqy alady. Kompanııamyz bıznestiń áleýmettik jaýapkershiligin de esten shyǵarǵan emes. Aýylda mektep te saldyq. Aldaǵy jyly búkil aýyldaǵy úıge sý qubyryn tartyp, kóshelerimizdi jaryqtandyrmaq oıymyz bar. Josparymyz óte kóp. Jastar jylynyń ashylý saltanatynda Elbasynyń aıtqan sózderinen qanattanyp shyqtyq jáne elimizdi kórkeıtý jolyndaǵy jumysymyzdy jandandyra túsýge daıynbyz», - dedi Dalel Júzbaev.