«Jas qanat-2023» baıqaýynyń jeńimpazdary anyqtaldy
Fınalda saıyskerler belgili kompozıtor, dırıjer jáne óńdeýshi Ilıa Bashqatovtyń jetekshiligimen tamasha kásibı Live bendynyń súıemeldeýimen óner kórsetti. Bul – «Jas qanat» baıqaýynyń jańalyǵy.
Eki jarys kúnindegi daýys berý qorytyndysy boıynsha eń joǵary upaı jınaǵan 8 qatysýshy fınalǵa shyqty. Aıta ketý kerek, bul konkýrsanttar birinshi jarys kúninen-aq ózderin tanytqan edi. Fınalda qazylar alqasynyń arasynda kelispeýshilikter bolǵan joq – barlyǵy biraýyzdan kimge qandaı oryn berý kerektigine kelisti.
Sonymen qatar, qazylar alqasynyń biraýyzdan sheshimimen baıqaýda alǵash ret bekitilgen Murat Erǵalıev pen Aleksandr Ponomarev atyndaǵy Gran-prı atyraýlyq Ernazar Jubanǵa berildi. «Altyn qanat» (1-oryn) aqtóbelik Narǵyz Januzaqovaǵa, «Kúmis qanat» (2-oryn) almatylyq Benazır Álimhodjaeva, «Qola qanat» (3-oryn) almatylyq Almagúl Battalıevaǵa buıyrdy.
Qalǵan tórt fınalıst baıqaýdyń dıplomanty atandy. Olar – oraldyq Arýjan Bısembaı, petropavldyq Narıman Joldasbekov, pavlodarlyq Mádına Qabdolla jáne shymkenttik Nurasyl Satybaldy.
Qazylar alqasynyń keıbir músheleri óz júldelerin belgiledi. Medeý Arynbaev óz júldesin eki qatysýshyǵa – petropavldyq Narıman Joldasbekov pen oraldyq Arýjan Bısembaıǵa qazaqtyń án dástúrine beı-jaı qaramaǵany úshin tabys etti. Renat Gaısın Nurasyl Satybaldyny óz qanatyna aldy. Baıǵalı Serkebaev Ernazar Jubanǵa óziniń Emporio Music Fest mýzykalyq festıvaliniń arnaıy júldesin tabys etti. Júlde – eń tanymal Montreux Jazz Festival djaz festıvaline saıahat. Ol 5-7 shilde aralyǵynda ótedi, oǵan álemniń eń tanymal mýzykanttary keledi.
Fınaldan tys qalǵan «Jas qanat» baıqaýynyń 12 qatysýshysy dıplom-sertıfıkatqa ıe boldy. Biraq, olar konkýrstan tys keremet án shyrqady. Bálkim, qazylar alqasy basqa marapattar taǵaıyndamaǵanyna ókingen de shyǵar.
Bıyl aty ańyzǵa aınalǵan «Azııa daýysy» festıvali qaıta jandanyp keledi. Oǵan daıyndyq barysynda elimizdegi eń baıyrǵy oqý orny – Temirbek Júrgenev atyndaǵy Qazaq ulttyq óner akademııasy men halyqaralyq «Azııa daýysy» festıvaliniń basyn qosqan qyzyqty shyǵarmashylyq joba uıymdastyryldy. Joba – akademııa stýdentteri arasyndaǵy stsenografııalyq baıqaý. Baıqaýǵa qatysýshylarǵa eski, belgili stıl men kelbetti saqtaı otyryp, festıvaldiń jańa stılin usyný mindeti qoıyldy. Aıta ketý kerek, qatysýshylar bul tapsyrmany tamasha oryndap, komıssııa músheleri biraýyzdan eki jeńimpaz bolýy kerek degen qorytyndyǵa keldi. Olar – Dana Nurshaeva men Álıhan Satybaldy. Olar da syılyqtarmen marapattalyp, «Azııa daýysy-2023» stsenografııasyn jasaý úshin shyǵarmashylyq topqa shaqyryldy.