Jas qalamgerlerge arnalǵan Prezıdenttiń ádebı syılyǵy taǵaıyndalady – mınıstr Oralov

ASTANA. QazAqparat – Bıyl jas qalamgerlerdi qoldaý maqsatynda arnaıy Prezıdenttik ádebı syılyǵy taǵaıyndalatyn bolady. Mádenıet jáne sport mınıstrliginiń keńeıtilgen alqa otyrysynda vedomstvo basshysy Ashat Oralov osylaı málim etti, dep habarlaıdy QazAqparat tilshisi.

«Tól ádebıetimizdi jańa dúnıelermen tolyqtyryp, ultymyzdyń ádebı murasyn molaıtý, otandyq ádebıetke, baspa uıymdaryna tyń serpin berýdi kózdeıtin «Aıboz» ulttyq ádebı syılyǵy taǵaıyndaldy. Bul bastamalardyń bári otandyq ónerge, mádenıet pen ádebıetke tyń serpin syılaǵan jobalarǵa aınaldy. Rýhanı qazynamyz kóptegen jańa týyndylarmen tolyqty.

Endigi kezekte osy ıgi dástúrdi odan ári óristetý maqsatymen bıyl jańa jobalardy júzege asyrýdy kózdep otyrmyz. Atap aıtqanda, jas qalamgerlerdi qoldaý maqsatynda arnaıy Prezıdenttik ádebı syılyǵy taǵaıyndalatyn bolady», - dedi Ashat Oralov.

Onyń aıtýynsha, aldaǵy ýaqytta mádenıet salasynyń qyzmetkerleri úshin halyqaralyq forým ótedi.

«Sonymen qatar mádenıet qyzmetkerleriniń halyqaralyq forýmyn uıymdastyramyz. Bul sala mamandarynyń biliktiligin arttyryp, halyqaralyq tájirıbeni ıgerýine múmkindik beredi. Osy aıtylǵan jumystardyń joǵary deńgeıde júzege asýyna zııaly qaýymnyń belsendi qatysýy óte mańyzdy. Qoǵam men jastardyń tárbıesinde aǵa býynnyń atqaratyn róli zor, alatyn orny erekshe», - dep túıindedi mınıstr.

Eske salaıyq, eks-mınıstr Dáýren Abaev jas jazýshylar men aqyndarǵa arnalǵan Prezıdenttik ádebı syılyq 18 – 29 jas aralyǵyndaǵy avtorlarǵa beriletinin aıtqan bolatyn.

Búgingi alqa májiliste Ashat Oralov, sondaı-aq byltyr shet elderden Qazaqstan tarıhyna qatysty 7 myńnan astam qujat ákelingenin atap ótti.

Foto: primeminister.kz