Jas ǵalymdardyń zertteýlerin granttyq qarjylandyrý boıynsha konkýrs jarııalandy

ASTANA. QazAqparat – Jas ǵalymdar – postdoktoranttardyń irgeli jáne qoldanbaly ǵylymı zertteýlerin granttyq qarjylandyrýǵa arnalǵan «Jas ǵalym» jobasy boıynsha konkýrs jarııalandy, dep habarlaıdy QazAqparat.

QR Ǵylym jáne joǵary bilim mınıstrliginiń málimetinde konkýrs 2023-2025 jyldarǵa arnalǵan.

Ótinimder ǵylymdy damytýdyń kelesideı basym baǵyttary boıynsha qabyldanady:

– sý resýrstaryn, janýarlar men ósimdikter dúnıesin utymdy paıdalaný, ekologııa;

– geologııa, mıneraldy jáne kómirsýtek shıkizatyn óndirý jáne qaıta óńdeý, jańa materıaldar, tehnologııa, qaýipsiz buıymdar men konstrýktsııalar;

– energetıka jáne mashına jasaý;

– jaratylystaný ǵylymdary salasyndaǵy ǵylymı zertteýler;

– agroónerkásiptik keshenniń turaqty damýy jáne aýyl sharýashylyǵy óniminiń qaýipsizdigi;

– ómir jáne densaýlyq týraly ǵylym;

– aqparattyq, kommýnıkatsııalyq jáne ǵaryshtyq tehnologııalar;

– áleýmettik jáne gýmanıtarlyq ǵylymdar salasyndaǵy zertteýler;

– bilim jáne ǵylym salasyndaǵy zertteýler;

ulttyq qaýipsizdik, qorǵanys jáne mamandyrylǵan ǵylymı baǵyttar.

Konkýrsqa ótinim qabyldaý 3 – 31 qazan aralyǵynda https://is.ncste.kz saıtynda júrgiziledi.