Jas ǵalymdar latyn álipbıin qoldaıdy

ASTANA. QazAqparat - Lev Gýmılev atyndaǵy Eýrazııa ulttyq ýnıversıteti qazaq til bilimi kafedrasynyń meńgerýshisi Ardaq Beısenbaıdyń oıynsha, latyn álipbıiniń sońǵy nusqasy burynǵysynan tıimdi. Sebebi «bir dybys - bir árip» qaǵıdaty tolyǵymen saqtalyp otyr, dep habarlaıdy QazAqparat tilshisi.

«Iá, Prezıdentke kórsetilgen latyn álipbıiniń sońǵy nusqasy aldyndaǵy nusqadan tıimdi ekeni anyq. Sebebi bul joly «bir dybys - bir árip» qaǵıdaty saqtalǵan. Usynylyp otyrǵan nusqany qoldaý qajet. Latynǵa kóshý tikeleı Elbasynyń bastamasymen qolǵa alynyp otyrǵandyqtan, oǵan daıyndyq memlekettik deńgeıdegi strategııalyq maqsatqa sáıkes qurylyp otyrǵany belgili», - dedi Beısenbaı QazAqparat tilshisine bergen suhbatynda.

Jas ǵalymnyń aıtýynsha, latyn álipbıin qabyldaý týraly bastama birshama ýaqyttan beri aıtylyp keledi. «Negizi, usynystar qashanda aıtyla beredi. Usynystar boldy, bolady da. Sondyqtan latyn álipbıiniń naqty bir nusqasyn qabyldaý qajet. Al ony óz tilimizge barynsha beıimdeý, halyqaralyq keńistikke kirigý jaǵyn birtindep sheshe berýge bolady. Eń bastysy, tól dybystarymyzdy saqtap qalýymyz qajet», - dep atap kórsetti kafedra basshysy.