Jas ǵalymdarǵa baıqaýlar arqyly beriletin granttyń qarjy kólemin arttyrý kerek – Prezıdent

<p>ASTANA. KAZINFORM &ndash; Aqordada ótip jatqan Ǵylym jáne tehnologııalar jónindegi ulttyq keńestiń otyrysynda Memleket basshysy Qasym-Jomart Toqaev ǵylymnyń kadrlyq áleýetin nyǵaıtý máselesi týraly aıtty.</p>

Prezıdenttiń sózinshe, búgingi tańda ekonomıkanyń mańyzdy salalary boıynsha kásibı mamandar daıarlaý jumysyn kúsheıtý kerek. 

«Ǵylymı jańalyqtyń bári ǵalymdardyń tynymsyz eńbeginiń nátıjesi ekeni sózsiz. Kez kelgen jetistik, eń áýeli, adamǵa, ıaǵnı adam kapıtalyna tikeleı baılanysty. Sondyqtan jas ǵalymdardy jan-jaqty qoldaý qajet. Grant arqyly júzege asyrylatyn jobalardyń úshten biri jas ǵalymdarǵa tıesili. Árıne, mundaı jobalardyń sanynan góri, sapasy mańyzdy. Jyl saıyn jas ǵalymdarǵa baıqaýlar arqyly beriletin granttyń qarjy kólemin arttyrý kerek. Qazir jas ǵalymdarymyz álemdegi jetekshi zertteý ortalyqtarynda stajırovkadan óte alady. Bul – jaqsy úrdis. Ony jalǵastyra berý qajet. Meniń tapsyrmammen júzege asyrylyp jatqan «Jas ǵalym» baǵdarlamasynyń tıimdi ekenin kórip otyrmyz. Onyń aýqymyn keńeıtý kerek. ıAǵnı oǵan ǵylymı ınstıtýttarda jáne uıymdarda jumys isteıtin jas mamandardy qosýǵa bolady», - dedi Prezıdent.

Sondaı-aq Memleket basshysy ǵalymdarǵa doktorantýradan keıin shetelde taǵylymdamadan ótýge múmkindik berý qajettigine toqtaldy.

«Olardyń zertteý jumysymen alańsyz aınalysýyna jaǵdaı jasaý kerek. Ǵalymdar laıyqty stıpendııa alýǵa tıis. Shetelde tájirıbeden ótken azamattardyń ishinde doktoranttardyń úlesi – nebári 1,6 paıyz. Bul – óte az. Úkimet olardyń qataryn kóbeıtý úshin naqty sharalar qabyldaýy qajet. Elimizdiń oqý oryndarynda bilim alyp júrgen azamattardyń arasynda da doktoranttardyń úlesi tómen. Men byltyr doktorantýraǵa jyl saıyn 5 myń adamǵa deıin qabyldaý týraly tapsyrma berdim. Ol úshin tyń tásilder kerek. PhD-di ǵylymı áleýeti zor jáne tereń zertteý júrgize alatyn bilim ordalary daıarlaýǵa tıis. Úkimet magıstratýra jáne doktorantýra baǵdarlamasyna arnalǵan granttyń qunyn arttyrý qajet. Bilikti mamandardy irikteý, daıarlaý jáne olardyń ǵylym salasynda qalýyna jaǵdaı jasaý – óte mańyzdy másele. Grant sanyn arttyryp, onyń qunyn kótergen kezde osy máselege basa mán berý kerek», - dedi Qasym-Jomart Toqaev.

Ol keltirgen málimetterge qaraǵanda, aldyńǵy jyly bir jarym myńnan astam doktoranttyń nebári 38 paıyzy dıssertatsııa qorǵaǵan. Olardyń jartysyna jýyǵy ǵana ǵylym salasynda qaldy.

«Ǵylym doktorlaryn daıyndaýǵa orasan zor qarjy jumsalǵanyn eskersek, bul kórsetkish áli de tómen. Bul máseleni tyńǵylyqty zerdelep, ahýaldy túzeý úshin qajetti shara qabyldaýdy tapsyramyn»». - dedi Qasym-Jomart Toqaev.