Jarty jylda jyljymaly medıtsınalyq keshen 1530 aýylǵa bardy
Densaýlyq saqtaý mınıstrliginiń málimetinshe, qazirgi ýaqytta elimizde 149 jyljymaly medıtsınalyq keshen mamandardyń qyzmetterin jáne keń beıindi dıagnostıkalyq qyzmetterdi usynady. 2022 jyldyń jarty jylynda JMK qyzmetimen 1530 eldi meken qamtyldy jáne 822 325 aýyl turǵynyna qyzmet kórsetildi.
« 358 181 dıagnostıkalyq zertteý, 222 485 zerthanalyq zertteý, 787 292 beıindi mamandardyń konsýltatsııasy júrgizildi, 50 689 naýqas anyqtaldy, onyń ishinde 12 883 adam esepke alyndy. Sondaı-aq, shalǵaı eldi mekenderdiń turǵyndary medıtsınalyq poıyzdardan medıtsınalyq tekserý men dıagnostıka alady», - dep jazdy vedomstvodan.
Esterińizge sala keteıik, medıtsınalyq poıyzdar jobasy Densaýlyq saqtaý mınıstrliginiń qoldaýymen «Samruk-Kazyna Trust» áleýmettik jobalardy damytý qory «Samuryq-Qazyna» AQ kompanııalar tobynyń atynan «Qazaqstan Temirjoly» UK AQ janyndaǵy «Áleýmettik jobalar qory« Korporatıvtik qorymen birlesip júzege asyrylýda.
23 mamyrdan bastap «Járdem« medıtsınalyq poıyzy josparlanǵan 79 stantsııaǵa bardy, 8036 turǵyn, 3255 bala tekserildi. Dárigerlik qabyldaý - 34 911, shaǵyn hırýrgııalyq operatsııalar - 138.
Óz kezeginde «Salaýatty Qazaqstan« medıtsınalyq poıyzy josparlanǵan 68 stantsııaǵa bardy, 1781 turǵyn, 246 bala tekserildi. Dárigerlik qabyldaý - 1781, shaǵyn hırýrgııalyq operatsııalar - 195.
Jalpy, medıtsınalyq poezdar 366 myńnan astam adamdy medıtsınalyq qyzmettermen qamtıdy, al dárigerge kelýshilerdiń sany 100 000-dy quraıdy dep josparlanýda.
Sonymen qatar, aýyl turǵyndary úshin aýrýlardy anyqtaýǵa arnalǵan kásibı tekserýlerdiń tizbesi keńeıtildi. Tıisti buıryqty Densaýlyq saqtaý mınıstrligi bekitti.
« Osylaısha, aýyl turǵyndaryn profılaktıkalyq tekserýdi júrgizý úshin 18 jastan 29 jasqa deıingi jańa nysanaly topty anyqtaý esebinen júrek-qantamyr júıesi, qant dıabeti, asqazan men búırektiń sozylmaly aýrýlaryn erte satysynda anyqtaý maqsatynda halyqty qamtýdy ulǵaıtý kózdelgen. Sondaı-aq, aýyl turǵyndaryna asqazan-ishek joly, zár shyǵarý júıesi, eresek jastaǵy toptaǵy týberkýlez jáne qýyqasty bezi obyryn erte anyqtaý qyzmetteri keńeıtildi», - delingen mınıstrliktiń aqparatynda.