Jarty jylda zańdaǵy samokatqa qatysty normalar qaıta qaralýy múmkin - Senat tóraǵasy
Bul turǵyda elektr samokattardy paıdalaný tártibine qatysty biraz suraq bolǵan, dep habarlaıdy QazAqparat tilshisi.
«Bul jaǵdaıda bizge sheshim qabyldaý óte kúrdeli boldy. Biz zańdy taǵy bir ret saralap, qaraý úshin Májiliske qaıtarǵymyz da keldi. Biraq aqyldasý men jan-jaqty talqylaýdyń nátıjesinde quqyqtyq turǵydan qoldanylý máselesin qaraý kerek degen pikirge keldik. Ol qalaı jumys isteıdi? Joldaǵy adamdardyń ómirine qaýip tóndirmeı me? Eń aldymen, samokatshylardyń ózderine qaýipti emes pe?», – dedi M. Áshimbaev.
Senat Tóraǵasy búgin zańdy Palata maquldasa da aldaǵy jarty jyl ishinde zańnyń quqyq qoldaný tájirıbesine erekshe nazar aýdarylatynyn aıta kelip, máselege qaıta oralý qajet bolatynyn atap ótti.
«Men osy másele boıynsha azamattarǵa, múddeli uıymdarǵa qarata aıtyp otyrmyn. Bizdiń esigimiz ár ýaqytta ashyq. Biz Májilistegi áriptesterimizben birge quqyq qoldaný jaǵdaıyn qarastyramyz jáne qajet bolǵan jaǵdaıda, bul zańdy túzetýge týra keledi. Іshki ister mınıstrligi óz kezeginde jolda samokat júrgizetin adamdardyń qaýipsizdigin qamtamasyz etý úshin bárin jasaýy kerek. Bul asa mańyzdy másele. Tutastaı alǵanda, bizdiń pikirimiz – osy normalardy qoldanýǵa múmkindik berý kerek jáne uzaqqa sozbaı bul zańǵa qaıta oralǵan jón», – dedi Senat spıkeri.
Budan buryn habarlanǵandaı, Іshki ister mınıstrligi Ákimshilik polıtsııa komıtetiniń tóraǵasy Qaısar Sultanbaev jeke adamdardyń menshigindegi samokattardyń jyldamdyǵyn baqylaý múmkin bolmaı turǵanyn aıtty.
Aıta keteıik, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine jol júrisin uıymdastyrý máseleleri boıynsha ózgerister men tolyqtyrýlar engizý týraly» Zańy maquldandy.
«Elektrondyq samokat» uǵymy engizilip, ol eń joǵary konstrýktıvtik jyldamdyǵy saǵatyna 25 kılometrden aspaıtyn kólik quraly dep tanylady jáne olardyń qozǵalysy úshin tıisti oryndar aıqyndaldy.
Atap aıtqanda, Zańmen engizilgen sharttar men tyıymdardy saqtaı otyryp, joldyń júris bóliginiń oń jaq sheti boıynsha elektr samokattardyń júrýine ruqsat etiledi. Bul turǵyda júrgizýshiniń 18 jasqa tolýy, kez kelgen sanattaǵy kólik quralyn basqarý quqyǵyna júrgizýshi kýáligi men shlemniń bolýy, al táýliktiń qarańǵy ýaqytynda qozǵalý kezinde basqa kólik quraldarynyń júrgizýshilerine kórinýi úshin tıisti jaryq túsiretin belgilerdi taǵý eskerilgen.
Elektr samokatyna trotýar nemese jaıaý júrginshiler jolymen saǵatyna 6 km-den aspaıtyn jyldamdyqpen júrýine ruqsat etiledi. Shaǵyn elektr kólik quraldary men elektr samokattary júrgizýshileriniń quqyqtary men mindetteri belgilenedi.