Jarty jylda memlekettik bıýdjetke 9,2 trln teńge tústi

ASTANA. QazAqparat – QR Premer-Mınıstriniń orynbasary – Qarjy mınıstri Erulan Jamaýbaev jarty jyldaǵy memlekettik qarjyny ıgerý kórsetkishterin baıandady, dep habarlaıdy QazAqparat tilshisi.

«Jarty jylda memlekettik bıýdjetke 9,2 trln teńgeden asa kiris tústi nemese 102,3%-ke oryndaldy. Respýblıkalyq bıýdjetke 6,1 trln teńge tústi. Jospar 94,7%-ke oryndaldy, al atqarylmaǵan bóligi 343 mlrd teńgeni qurady», - dedi mınıstr Úkimettiń búgingi otyrysynda.

Onyń aıtýynsha, salyqtar boıynsha jospardyń 391 mlrd teńgege oryndalmaýy negizinen korporatıvtik tabys salyǵy, shıki munaıǵa eksporttyq keden bajy jáne paıdaly qazbalardy óndirýge salynatyn salyq esebinen boldy.

Korporatıvtik tabys salyǵy boıynsha jospardyń oryndalmaýy – 2023 jyldyń 6 aıynda 296 iri salyq tóleýshi boıynsha málimdelgen avanstyq tólemder somasynyń ótken jylǵy kórsetkishten 36%-ke nemese 128 mlrd teńgege azaıýymen baılanysty.

«Shıki munaıǵa eksporttyq keden bajy boıynsha jospardyń negizgi oryndalmaýy eksporttyq keden bajynyń naqty qalyptasqan mólsherlemesiniń boljamdy kórsetkishten 13%-ke tómendeýimen baılanysty boldy. Paıdaly qazbalardy óndirýge salynatyn salyq boıynsha jospardyń oryndalmaýyna negizgi eksporttyq taýarlar baǵasynyń orta eseppen 17%-ke tómendeýi áser etti», - dep túsindirdi Qarjy mınıstri.