Jarty jylda medıtsına sapasyna 4,6 myńnan astam shaǵym túsken

ASTANA. QazAqparat – Elimizde bıyl 6 aıdyń ishinde medıtsınalyq qyzmettiń sapasyzdyǵyna qatysty 4649 shaǵym jasalǵan, dep habarlaıdy QazAqparat tilshisi Densaýlyq saqtaý mınıstrligine silteme jasap.

«Medıtsınalyq qyzmet kórsetý salasyndaǵy memlekettik baqylaý zańbuzýshylyqtardyń aldyn alýǵa, anyqtaýǵa jáne jolyn kesýge baǵyttalǵan. Memlekettik baqylaý medıtsınalyq qyzmetterdiń sapasyna saraptama arqyly jasalady. 2023 jyldyń 1 jartysynda komıtet jáne onyń aýmaqtyq departamentteri 4649 ótinish-shaǵymdy qarap, 1138 jospardan tys tekserý júrgizdi. Medıtsınalyq qyzmetter sapasy boıynsha jospardan tys tekserý Kásipkerlik kodeksiniń 144-babynyń 5-tarmaǵymen, sondaı-aq jeke jáne zańdy tulǵalardyń ótinishi boıynsha dáleldi negizder arqyly júzege asady», - delingen aqparatta.

Mınıstrliktiń habarlaýynsha, azamattardyń aryz-shaǵymy qaralǵannan keıin 10 kúnniń ishinde tıisti shara qabyldanýy tıis.

«Medıtsına nemese farmatsevtıka qyzmetkeriniń kásiptik mindetterine salǵyrt qaraýy nemese olardy oryndamaýy, qasaqana nemese abaısyzda adamnyń densaýlyǵyna zııan keltirgen jaǵdaıda qylmystyq jaýapkershilik qarastyrylǵan», - deıdi vedomstvodan.

Buǵan deıin shet memleketterge baryp kelgen otandastarymyzdyń kóbinde qandaı aýrý, ınfektsııa nemese vırýs juqtyryp keletinin habarlaǵan edik.