Jarty jylda Qazaqstannyń jalpy ishki ónimi 4,1 paıyz ósti

ASTANA. QazAqparat - Aǵymdaǵy jyldyń 6 aıynda elimizdiń jalpy ishki ónimi 4,1 paıyzǵa ósti. Bul týraly búgin Úkimet otyrysynda qańtar-maýsymdaǵy elimizdiń áleýmettik-ekonomıkalyq damý qorytyndylary jaıynda baıandaǵan QR Ulttyq ekonomıka mınıstri Tımýr Súleımenov aıtty, dep habarlaıdy QazAqparat tilshisi.

«Ekonomıkalyq protsesterdiń damýy teńgerimdi ósý arnasynda turaqty saqtalýda. Ekonomıkalyq qyzmettiń barlyq segmentterinde derlik oń serpin baıqalyp otyr. Aǵymdaǵy jylǵy birinshi jartyjyldyqtyń qorytyndysy boıynsha jalpy ishki ónimniń ósýi 4,1 paıyzdy qurady. Jalpy ekonomıkanyń kóterilýi ınflıatsııalyq protsesterdiń jalǵasyp kele jatqan báseńdeýi jáne joǵary ınvestıtsııalyq belsendilik aıasynda bolyp otyr», - dedi mınıstr.

Onyń aıtýynsha, ınflıatsııa birtindep azaıyp kele jatyr jáne sońǵy úsh jyldaǵy eń tómen mánge jetti. Jyl basynan beri ol 2,6 paıyzdy qurady. Bul rette jyldyq ınflıatsııa - 5,9 paıyz. Inflıatsııanyń barlyq komponentteri boıynsha baǵa ósýiniń báseńdeýi baıqalady.

«Ónerkásip óndirisi 5,2 paıyzǵa artyp, ósý qarqyny saqtalýda. Taý-ken ónerkásibi 5,5 paıyzǵa ósti. Ósim negizinen Qashaǵanda munaı óndirý jumystarynyń aıtarlyqtaı asyra oryndalýyna baılanysty týyndap otyr. Josparlanǵan 4,9 mln tonnanyń ornyna 6,2 mln tonna óndirildi. Óńdeý ónerkásibi serpininiń turaqty ósýi baıqalady. Jartyjyldyqtyń qorytyndysy boıynsha ósý qarqyny 5,2 paıyz boldy», - dedi Tımýr Súleımenov.

Mınıstrdiń dereginshe, óńdeý salasynyń arasynda eki mándik ósý qaǵaz ónimderin óndirýde (12,0%), hımııa ónerkásibinde (11,0%) jáne mashına jasaýda (17,2%) saqtalyp otyr. Metallýrgııa (3,4%), munaıdy qaıta óńdeý (4,4%) jáne tamaq ónimderin óndirý (5,2%) sııaqty óńdeýdiń basqa da iri salalary boıynsha oń ósim saqtalýda.