Jarty jyl ishinde Qazaqstanda 23 halyqaralyq jáne 40 aımaqtyq esirtki kanaldary joıylǵan
Bul málimetterdi búgin Qasym-Jomart Toqaev Ulttyq qaýipsizdik komıtetiniń 30 jyldyǵyna arnalǵan saltanatty jıynda málim etti, dep habarlaıdy QazAqparat.
Memleket basshysy ulttyq qaýipsizdik organdarynyń eki myńynshy jyldary terrorızm men radıkaldy dinı ekstremızmge qarsy kúreske qosqan úlesine toqtaldy. Sondaı-aq Syrtqy barlaý qyzmetiniń ulttyq múddeni qorǵaý jolynda óz mindetin tabysty oryndap kele jatqany jáne Komıtettiń «A» arnaýly qyzmeti men Shekara qyzmetiniń jumystary týraly aıtty.
– Jyl basynan beri Komıtet qyzmetkerleriniń tıimdi jumysynyń arqasynda ekstremıstik áreketterge qatysqan jáne terrorızmdi nasıhattaǵan 42 adam ustaldy. Eki terrolyq aktiniń aldyn aldy. Uıymdasqan qylmysqa qarsy kúres qarqyndy júrgizilýde. Ulttyq qaýipsizdik organdary polıtsııamen birlesip, birqatar asa qaýipti qylmystyq topty quryqtady, bandıttik uıymdardyń 22 múshesi tutqyndaldy. Nátıjesinde 700-ge jýyq qarý-jaraq, 54 granata, 17 myńnan astam oq-dári tárkilendi. Jarty jyldyń ishinde elimizde 15 esirtki laboratorııasy, 23 halyqaralyq jáne 40 aımaqtyq esirtki kanaldary joıyldy, 3 esirtki plantatsııasy áshkerelendi. Sheteldik seriktestermen birlesip, halyqaralyq esirtki tasymalyna qarsy kúres aıasynda 14 halyqaralyq arnaıy operatsııa júzege asyryldy, – dedi Qasym-Jomart Toqaev.
Sonymen qatar Prezıdent Ulttyq qaýipsizdik komıteti qyzmetiniń mán-mańyzyna toqtıala kele:
– Ulttyq qaýipsizdik júıesi – memlekettigimizdiń basty tuǵyry. Sondaı-aq, derbes damýymyzdyń myzǵymas tiregi. Otan úshin aıanbaı eńbek etip júrgen azamattardyń arqasynda elimiz ósip-órkendeýde. Sizder ishki jáne syrtqy qaýip-qaterlerge der kezinde toıtarys berip kelesizder. Búginde memlekettiń negizi jáne konstıtýtsııalyq qurylymy berik qorǵalǵan. Táýelsizdigimizdiń qundylyqtary birneshe ret eleýli syn-qaterlerge tap keldi. Sizder beıbitshilik pen kelisimdi saqtaý úshin tabandy eńbek ettińizder, – dedi Prezıdent.
Aıta keteıik, jıynda Memleket basshysy UQK organdarynyń ardagerlerin, ofıtserleri men qyzmetkerlerin quttyqtap, olardyń Qazaqstan memlekettigin nyǵaıtýǵa qosqan úlesin atap ótti.
Foto: nieuwsblad.be