Jarty ǵasyrda alǵash ret oblıgatsııalar naryǵynyń tómendeýi tirkeldi - UB

ASTANA. QazAqparat – Álemdegi ortalyq bankter ınflıatsııamen kúreste aqsha-kredıt saıasatyn sınhrondy túrde kúsheıtýdi jalǵastyryp keledi. Bul týraly Úkimet otyrysynda QR Ulttyq banki tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Álemdegi ortalyq bankter ınflıatsııamen kúreste aqsha-kredıt saıasatyn sınhrondy túrde kúsheıtýdi jalǵastyryp keledi: AQSh Federaldy rezervtik júıesi qyrkúıekte mólsherlemeni úshinshi ret 75 bazıstik tarmaqqa, Eýropa ortalyq banki mólsherlemeni 75 bazıstik tarmaqqa kóterdi. Bul memlekettik baǵaly qaǵazdar kiristiliginiń buryn-sońdy bolmaǵan ósýine jáne jarty ǵasyrda alǵash ret oblıgatsııalar naryǵynyń tómendeýine ákeldi», - dedi Ǵalymjan Pirmatov.

Onyń derginshe, osy jyldyń basynan bastap mólsherlemelerdiń ósýi aıasynda damyǵan elderdiń aktsııalary (MSCI World) 27 paıyzǵa tómendedi. AQSh-tyń 10 jyldyq memlekettik baǵaly qaǵazdarynyń kiristiligi 1,51 paıyzdan 3,83 paıyzǵa deıin 2,32 paıyzdyq tarmaqqa ósti. AQSh dollarynyń ındeksi jyl basynan 17,2 paıyzǵa arty.

«Investorlar Ulybrıtanııanyń fıskaldyq yntalandyrý boıynsha jarııalaǵan josparlaryn teris qabyldady jáne ol fýnt sterlıng pen sol eldegi memlekettik baǵaly qaǵazdardyń quldyraýyna ákeldi. Qarjylyq sharttardy kúsheıtý jáne retsessııanyń ósip kele jatqan táýekelderi aıasynda qorǵanysh aktıvterine kóshý jalǵasýda. Qor naryqtary qatarynan 3 toqsan boıy tómendep, 2008 jyldan bastap eń uzaqqa sozylǵan quldyraýǵa jol berdi», - dedi Ǵalymjan Pirmatov.