Jarty ǵasyr kúrdeli jóndeý kórmegen: ShQO-daǵy Tuǵyl aýylynda aýrýhananyń jaǵdaıy múshkil

<p>ÓSKEMEN. KAZINFORM &ndash; Shyǵys Qazaqstan oblysy Tarbaǵataı aýdany Tuǵyl aýylynyń turǵyndaryn tolǵandyryp otyrǵan negizgi másele &ndash; tozyp bara jatqan aýrýhananyń jaǵdaıy. Kezinde halqy 10 myńnan asyp jyǵylatyn eldi mekende búginde 4 myńǵa jýyq qana adam qalǵan. Bunyń bir sebebi &ndash; dertine shıpa izdegen jurt basqa jaqqa sabylyp júr.&nbsp;</p>

Aýyl turǵyny Erkin Oraluly Tuǵyldaǵy jar degende jalǵyz medıtsınalyq mekemeniń múshkil jaǵdaıyn aıtyp berdi.

— Bul buqaranyń únemi kóterip kele jatqan máselesi. Alaıda áli kúnge deıin sheshimin tappady. Aýrýhananyń materıaldyq-tehnıkalyq bazasy tómen deńgeıde, shtattaǵy qyzmetkerler sany da qysqarǵan, — deıdi ol.

Foto: Tuǵyl aýyly turǵyndarynan

Tuǵyl Óskemennen 400 shaqyrymdaı jerde oryn tepken balyqshylar aýyly. Ondaǵy aýrýhana Keńes ókimeti ydyramaı turyp salynǵan. Kezinde juqpaly aýrýlar bólimi bolǵan.

— Sonda balalardy jeke, áıelderdi jeke qaraıtyn. Perzenthana jumys istep turdy, shuǵyl otalar da jasalatyn. Biraq toqyraý jyldarynda barlyǵy jabyldy. Qazir eki mektep, órt sóndirý bólimi bar. Segiz balyq óndiretin shaǵyn tseh, aýyldyq klýb pen eki balabaqsha jumys istep tur. Aýyldyń tirshiligi áli turalamady. Etekten tartyp turǵany — talaıdan beri kúrdeli jóndeý kórmegen aýrýhana. Syrttaı qaraǵanda kelbeti kelisken sekildi. Sebebi bastapqyda sapaly salynǵan. Biraq 50 jyl boldy ishi tozyp tur. Tóbeden sý aqqan kezderi boldy, eski jıhazdary jańartylmaǵan, — deıdi aýyl turǵyny Názıpa Keshýbaeva.

Foto: Tuǵyl aýyly turǵyndarynan

Onyń aıtýynsha, Qazaqstan KSRO-dan bólinip, táýelsizdik alǵaly Tarbaǵataıda segiz ákim aýysty. Sol ákimderdiń talaıy bergen ýáde sol kúıi oryndalmaı keledi.

Tuǵyldyqtardyń máselesine qatysty ShQO densaýlyq saqtaý basqarmasy basshysynyń orynbasary Aınash Qapanova jaýap berdi.

— Aýrýhana 1979 jyly salynyp, 1981 jyly qoldanysqa berilgen. 2014 jyly aǵymdaǵy jóndeýden ótkizildi. Kezinde Tuǵyl aýylynda halyq sany kóp boldy. Soǵan sáıkes, shtattaǵy qyzmetkerleri sany da bekitilgen. Qazir adam sany azaıyp qalǵandyqtan qysqartý boldy. Dese de zańdaǵy normatıv boıynsha aýrýhanaǵa 1 jalpy tájirıbelik dáriger jetispeı tur. Bul másele sheshimin tabýǵa jaqyn. Jýyq arada aýylǵa 1 dáriger keledi, — deıdi ol.

2017 jyly dárigerlik ambýlatorııa bólmeleriniń esikteri, terezeleri men jylý qazandyqtary jańadan aýystyrylypty. Sońǵy bes jylda aýdandyq aýrýhanada eki bas dáriger aýysqan.

Densaýlyq saqtaý basqarmasy tarapynan memlekettik saraptamanyń oń qorytyndysy alynǵan soń kúrdeli jóndeýge qarjy bólý úshin ekonomıka jáne bıýdjettik josparlaý basqarmasyna oblystyq máslıhat sessııasyna shyǵarý úshin qujattar joldanbaq. Alaıda aqsha bólinip, Tuǵyl halqyn tolǵandyrǵan másele sheshile me, ázirge belgisiz.

Eske salsaq, osyǵan deıin Óskemen halqy № 1 qalalyq aýrýhana ǵımaratynyń tozyp turǵanyna shaǵymdanǵan bolatyn.