Jarty ǵasyr boıy jınalǵan taý-ken qaldyqtaryn óńdeý qolǵa alyndy
- Aqtóbe áleýeti joǵary óńirlerdiń biri dep jıi aıtamyz. Munda ár salanyń óz damý joly, kórsetkishi bar. Ashat Berleshuly, elimizdiń batysyndaǵy iri megapolısti odan ári órkendetýge arnalǵan josparyńyzben bólisseńiz...
- Óńirimizge Prezıdent Qasym-Jomart Toqaev kelip, birqatar tapsyrma berdi. Áleýeti mol salalardy da atap ótti. Jumys kóp, atqarylar is aýqymdy. Birinshiden, ınvestıtsııa tartý. Ol úshin qýat kózi jetkilikti bolýy kerek. Balamaly qýat kózin óndirý baǵytynda ınvestorlar 500 MVt bolatyn birneshe jobany usynyp jatyr. Qazir mańyzdysy osy baǵyttaǵy sharýa bolyp tur.
Ekinshiden, ekonomıka damýy úshin jol máselesin sheshýimiz kerek. Memleket basshysy osy baǵytta da naqty tapsyrma berdi. Qazir «Aqtóbe-Qarabulaq-Ulǵaısyn» joly 7 ýchaskege bólindi. Eki ýchaskeniń birinde memlekettik satyp alý rásimi ótti, ekinshisiniń qujaty jaqynda daıyn bolady. Alǵashqy 56 shaqyrymy, ıaǵnı Aqtóbe qalasyna kireberisten Jazyq stansasyna deıingi aralyqta birinshi deńgeıli, tórt jolaqty jol qurylysy bastalady. Al ózge beseýine jobalyq-smetalyq qujatty daıyndaýdy keler jylǵa josparlap otyrmyz. Bul – tranzıttik kólik kóp júretin tasjol. Jaz aılarynda táýligine 16 myńǵa jýyq jeńil jáne júk kóligi ótse, qysta bul jol 8-9 myń kólikke qyzmet kórsetedi. Sońǵy jyldary júktemeniń bes ese óskenin kórip otyrmyz. Sondyqtan jańa jol tolyq salynyp bitkenshe eskisine jóndeý júrgizildi. Kólik mınıstrligi byltyr mıllıard teńge bóldi, bıyl taǵy mıllıard teńge berse, eki mıllıard teńgege 40 shaqyrym jóndeledi. Sonymen birge jalpy uzyndyǵy 259 shaqyrym bolatyn «Qandyaǵash-Shalqar» tas jolynyń da qurylysy bastaldy. Byltyr 20 shaqyrymy jóndelse, 2024 jyly Kólik mınıstrliginiń qoldaýymen taǵy 75 shaqyrymyn salýdy josparlanyp otyr. Tek Shalqardan emes, Qandyaǵash qalasynan bastalyp, eki jaqta qatar qurylys júrgiziledi. Sebebi Jurynǵa deıingi baǵyttyń jaǵdaıy óte nashar.
- Ózińiz aıtqandaı, jyl sońyna taman óńirge kelgen Memleket basshysy Qasym-Jomart Toqaev birneshe baǵyttaǵy jumyspen tanysty. Óndiristi de, shaǵyn jáne orta bıznesti de baǵamdady. Byltyr osy salanyń damý kórsetkishteri oń nátıje kórsetti me?
- Jyl saıyn óńirge trıllıon teńge ınvestıtsııa tartý kerek degen naqty mejemiz bar. Eń birinshi ımportty otandyq ónimge almastyrýǵa basymdyq berip otyrmyz. Qurylys materıaly da, mal azyǵy da, azyq-túlik te qamtylady. Investorlar Aqtóbege qyzyǵady. Búginde Aqtóbe oblysynyń ónerkásip salasynda 27 iri, 45 orta jáne belsendi jumys isteıtin 486 shaǵyn sýbekti bar. Byltyr 18 ınvestıtsııalyq joba aıasynda 900-ge jýyq jumys orny ashyldy. Bul baǵyttaǵy jumysta san emes, sapa mańyzdy ekenin umytpaıyq. Atap aıtar bolsam, ERG kompanııasy Dóń taý-ken baıytý kombınatynda shlamdardy qaıta óńdeý fabrıkasyn iske qosty. Bul degenimiz – jarty ǵasyrǵa jýyq ýaqyt boıy jınalǵan taý-ken qaldyǵyn jaratýǵa, sóıtip ekologııalyq máseleni sheshýge múmkindik bergen ınvestıtsııalyq joba.
Sonymen birge ishki naryqty munaı jabdyqtarymen qamtıtyn mobıldi burǵylaý qondyrǵylaryn óndirý zaýyty jumysyn bastady. Al Jańa Áljan kombınatynda mal azyǵy, ıaǵnı qurama jem shyǵaryla bastady. BulAqtóbeniń ǵana emes, Batys Qazaqstan óńirleriniń suranysyn qamtýǵa múmkindik beredi. Sonymen birge ERG, CNPC-Aqtóbemunaıgaz jáne Aqtóbe mys kompanııalary quny 200 mlrd teńgeden astam qarjy bólip, kásiporyndarynda jańǵyrtý jáne keńeıtý jumystaryn júrgizdi.
Al shaǵyn jáne orta bızneske keler bolsaq, Aqtóbe óńirler bólinisinde úzdikter qatarynda tur. Byltyr 4 myńǵa jýyq adam memlekettik baǵdarlamalardyń shapaǵatyn kórdi. Kásipkerlikti damytý baǵytyndaǵy Ulttyq joba sheńberinde1637 adam, «Aýyl amanaty» jobasy aıasynda 1655 adam qoldaýǵa ıe boldy. Barlyǵy 600-ge jýyq kópbalaly otbasyna 400 AEK kóleminde qaıtarymsyz grant berildi.
Taǵy bir erekshelikti atap ótý kerek. Ózimizdiń óńirlik baǵdarlama da iske asty. Hromtaý aýdanyndaǵy iri kásiporyndardyń aınalasynda shaǵyn jáne orta bıznesti damytý úshin 1 mlrd teńgege 53 joba maquldandy. Nátıjesinde ShOB sýbektileriniń sany 6,8% ósip, 96,5 myńǵa jetti. Qazir osy salada 181,5 myń adam eńbek etip júr.
- Aqtóbeniń birneshe aýdany egin sharýashylyǵy, al basym bóligi mal sharýashylyǵyna beıim. Qazir aýdan-aýyldy aralap, jaıylymdaǵy tórt túlikti kórip júrsiz. Sharýalarmen de kezdestińiz. Olar jıi kóteretin máseleni aıtsańyz.. Sheshý joly qarastyryldy ma?
- Óńirde bul sala da jaqsy damyp keledi. Byltyr aýyl sharýashylyǵyn qoldaý maqsatynda 14,5 mlrd teńge qarjy qarastyryldy. Prezıdent óz Joldaýynda jáne óńirimizge jumys saparynda «Aýyl amanaty» jobasynyń mańyzyn aıqyndap, memlekettiń sharýalarǵa, shaǵyn jáne orta bızneske barynsha qoldaý kórsetetinin atap ótkeni belgili. Joba aıasynda 2023-2024 jyldary respýblıkalyq bıýdjetten 19 mlrd teńge bólindi. Búgingi kúnniń ózinde 8 mlrd teńgege 1734 joba maquldandy. Nátıjesinde shaǵyn sharýashylyqtar 219 myńnan astam qus aldy, 210 gektarǵa kókónis egip, 97 shaǵyn jylyjaı salyndy. Budan bólek 142 shaǵyn sút óńdeý, 75 et óńdeý, 123 kondıter men naýbaıhana jumysyn bastady. Myńnan astam adam jeke kásipker retinde tirkelip, 1210 jańa jumys orny quryldy.
Rasymen de taǵaıyndalǵan soń 12 aýdandy aralap, problemalyq suraqtardy kóterip, ashyq dıalog qurdym. Ár aýdandaǵy sharýashylyqtardy qarap shyǵyp, ony júrgizip otyrǵan sharýalardyń talap-tilegin tyńdadym. Qazirgi kezde mal sharýashylyǵynyń barlyq salasynda ósim bar. Degenmen qoı sharýashylyǵyn damytý kezindegi kedergi men kemshin tusymyzdy aıta ketý kerek. Qoı júnin kádege jaratý úshin aýqymdy jumys júrgizilgen. Endi óńirde qurylys materıaly shyǵarylady. Qazir qabyldaý júrip jatyr. Al mal terisin kádege jaratý isine keler bolsaq, Aqtóbe oblystyq aýyl sharýashylyǵy jáne jer qatynastary basqarmasy ınvestor izdestirip jatyr. Aldaǵy ýaqytta bul is te sheshimin tabady degen senimdemiz. Sonymen birge sharýalar mal azyǵy shyǵyndaryn óteýge qoldaý surady. Jergilikti bıýdjetten qosymsha 2,9 mlrd teńge bólindi. Jalpy memlekettik qoldaýlardyń nátıjesinde 2023 jyldyń 11 aıynda 424 mlrd teńgeniń ónimi óndirildi.
- Endi turǵyn úı-kommýnaldyq sharýashylyq salasyna kelsek. Biz jaıly ómir súrý úshin jaryq, sý, gaz sekildi kúndelikti qajettiliktiń qoljetimdi bolǵanyn qalaımyz. Oblys halqyn osy qajettiliktermen qamtý jaıyna toqtalsańyz...
- Prezıdent 2025 jylǵa deıin barlyq aýyldy aýyz sýmen qamtýdy tapsyrdy. Oblystaǵy 320 eldi mekenniń 283-i ortalyqtandyrylǵan aýyz sý júıesin qoldanady. Taǵy 37 eldi meken uńǵymany paıdalanady. Byltyr Baıǵanın aýdanynyń Altaı batyr, Qobdanyń Jarsaı, Jaryq, Jańatalap, Oıyldyń Shubarshy aýyldaryna ortalyqtandyrylǵan sý jelisi júrgizildi. Onda 2285 adam turady. Sonymen qatar 13 aýylǵa keshendi blok modýl ornatyldy. Budan bólek 3 aýyldyń ortalyqtandyrylǵan sý jelisi qaıta jańǵyrtylyp, rekonstrýktsııalaý jumysy júrgizildi. Bıyl 37 aýyldyń 15-ine ortalyq sý júıesi júrgiziledi. Yrǵyzdyń Dúken, Qobdanyń Kók-úıine keshendi blok modýl qondyrylady. Sóıtip óńirdegi 926 myń adam (99,8%), ıaǵnı 300 eldi meken (93,7%) sýmen qamtylady. Aqtóbe qalasy aýmaǵyndaǵy turǵyn alaptarynda másele bar ekenin jasyrmaımyz. Ony sheshý úshin Sarybulaq jáne Moıseev sý toǵanyn paıdalanamyz. Mundaǵy sýqory 50 jylǵa jetedi. Shamamen 45-60 shaqyrymnan tartý kerek bolady. Qazirgi kezde jerasty sýynyń qory saraptamadan ótkizildi, Úkimetke qurylys jumysy úshin suranys jasaldy. Bıyl jumysty bastaýdy josparlap otyrmyz.
- Bizde sý qory jetkilikti me?
- Qala ishinde sý qory jetkiliksiz. Másele Sarybulaq-Moıseev sý toǵany arqyly sheshiledi. Sonymen birge «Kókjıde» bar. Mundaǵy munaı-gaz óndirý jumystary 2032 jylǵa deıin tolyq toqtatylady. Qazir munda 5 kompanııa bar. Bıyldyń ózinde 200-den astam uńǵymanyń teń jarysy toqtatylady. Jumys kezeń-kezeńimen iske asyrylady.
- Gazben qamtý jumysyna oıyssaq...
- Byltyr halyq sany 6,8 myńnan asatyn 16 aýyl (Áıteke bı aýdanynyń Qumqudyq, Yrǵyzdyń Nura, Amankól, Oıyldyń Ekpetal, Qarǵalynyń Álimbet, Mártóktiń Qarataýsaı, Baıtýrasaı, Qarabulaq, Muǵaljardyń Muǵaljar, Jarkemer, Jańaturmys, Hromtaýdyń Qudyqsaı, Qarlaý, Qobdanyń Bulaq, Qosótkel jáne Shalqardyń Eset batyr aýyldary) gazdandyryldy. Sóıtip 320 eldi mekenniń 168-i gazben jabdyqtaldy, ıaǵnı 886 myńnan astam turǵyn kógildir otynnyń ıgiligin kórip otyr degen sóz. Sonymen birge 2024 jyly halyq sany 2,8 myń adam bolatyn 7 aýylǵa (Baıǵanınniń Qorashı, Yrǵyzdyń Jarma, Mártóktiń Aqmolassaı, Baınassaı, Muǵaljardyń Jaryq, Temirdiń Altyqarasý, Eńbekshi aýyldary) gaz beriledi. Nátıjesinde oblysty gazben qamtý 95,8% jetedi. Budan basqa 27 aýyldy gazdandyrý úshin 21,3 mlrd teńgeden astam sommaǵa 21 jobalyq-smetalyq qujattama ázirlendi. Jalpy Aqtóbe qalasynyń kóp bóligin, irgeles eldimekender men ónerkásip obektilerine úzdiksiz gaz berý úshin «Buqara-Oral» magıstraldy gaz qubyrynyń úshinshi tizbegi salynyp jatyr. Quny – 43,4 mlrd teńge. Bıyl kúzde qurylys jumysy aıaqtalyp, qoldanysqa beriledi.
- Oblys ortalyǵy, ıaǵnı Aqtóbe qalasy týraly aıtsaq. Ózińiz basqardyńyz, problemalyq suraqtardy búge-shigesine deıin bilesiz. Qalany jaǵymsyz ıisten aryltatyn kún qashan týady?
- Eń birinshiden shamamen eki aıda Aqtóbe qalasynyń bas jospary bekitiledi. Sońǵy ret 2015 jyly úlken ózgertýler engizilgen. Al 2017-2018 jyldary biraz jer telimi berilip, qala aýmaǵy qaıta úlkeıdi. Bul jospar qalanyń naqty damý joly bolady. Qala, onyń aýmaǵyndaǵy turǵyn alaptary, áleýmettik nysandar qurylysy men ınfraqurylym bári-bári jan-jaqty qamtylady. Qaladaǵy jaǵymsyz ıis suraǵyna keler bolsaq, Jol kartasy ázirlendi. Ony daıyndaýǵa azamattyq qoǵam ókilderi, táýelsiz sarapshylar men memlekettik organ ókilderi tartyldy. Qujat ózekti ekologııalyq máselelerdi qamtıdy, bul baǵyt boıynsha aldaǵy úsh jylda tıimdi sharalar qabyldanady. Tozyǵy jetken kárizdik tazartý qurylystarynyń ornyna jańadan tazartý qondyrǵylary salynady. Jalpy quny 53,5 mlrd teńge bolatyn jobany Eýropalyq qaıta qurý jáne damý banki qarjylandyrady. Búginde jobanyń tehnıkalyq-ekonomıkalyq negizdemesi ázirlenip, memlekettik saraptamadan oń qorytyndy alyndy. Qurylys-montajdaý jumystary bıyl bastalady.
- Qoqys polıgony máselesi túbegeıli sheshimin tapty ma? Aýmaqty túgel qummen kómip tastaý byqsyp janýdan qorǵaı ma?
- Qaladaǵy eski qoqys polıgonynyń máselesi aqtóbelikterge jaqsy tanys. Bul polıgon 2007 jyldan beri turmystyq qatty qaldyqty qabyldap keldi. 17 jyl boıy jınalǵan qoqys 20 metr tereńdikke ketken. Odan túziletin metan gazy tutanyp, sońǵy jyldary, ásirese jaz aılarynda polıgonda jıi órt boldy. Biz byltyr 42 gektar aýmaq topyraqpen kómip, metan gazy syrtqa shyǵatyndaı etip, 74 dana qubyr ornattyq. Bul sharalar qoqystyń byqsyp, janýyn boldyrmaýy tıis. Qazirgi tańda qoqys 18 gektar jerge salynǵan jańa polıgonǵa tasymaldanyp jatyr.
- Aqtóbe qalasyn kógaldandyrý, jasyl jelekke bóleý úshin jyl saıyn kóshet egip, kóp aktsııa jasalady. Biraq áli de shahar ishi jutań kórinip tur. Bizde jasyl aımaq, demalys saıabaǵy bola ma?
- Jasyl aımaq qalyptastyrý, demalys saıabaqtarynyń qataryn kóbeıtý máselesi kún tártibinde tur. Ózińiz de kórgen bolarsyz, qala ortalyǵyndaǵy birneshe sýburqaq isten shyqqan. Olarǵa jóndeý jumystary jasalyp jatyr. Qazir Aqtóbe qalasyn keshendi kógaldandyrý úshin bes jyldyq joba ázirleý josparlandy. Bul memlekettik-jekemenshik áriptestik negizinde iske asady. Oǵan qaladaǵy 18 saıabaq pen gúlzarǵa sýarý júıelerin ornatý, kópjyldyq jáne birjyldyq gúl otyrǵyzý jáne kútý, jylyna 5 myń aǵash otyrǵyzý, sondaı-aq 45 myńnan astam aǵashty jasartý, kesý jáne sýarý jumystary kiredi. Joba saraptamadan ótip jatyr. Bir jyldyq shyǵyny shamamen 1,6 mlrd teńgeni quraıdy. Qazirgi tańda bıýdjetten 921 mln tege qarastyryldy.
- Aýqymdy qurylys taqyrybyna qaıta oralsaq... Memleket basshysy oblysqa saparynda teatr salýǵa tapsyrma bergenin bilemiz. Qazir osy baǵyttaǵy jumys qalaı júrip jatyr? Óńirde taǵy qandaı aýqymdy qurylys jumystary júrgiziledi?
- Prezıdent Aqtóbege jumys saparynda T. Ahtanov pen Q. Shańǵytbaevtyń eskertkishine baryp, taǵzym etti. Keıin oblystyq drama teatr ǵımaratyn aralap, óner salasynyń maıtalmandarymen kezdesti. Ǵımarattyń tozǵanyn kórip, jańa teatr salýdy tapsyrdy. Prezıdenttiń tapsyrmasy boıynsha jumys toby quryldy. Onyń quramynda oblystyq drama teatr basshylyǵy, belgili óner qaıratkerleri, ardager sáýletshiler jáne qaladaǵy sáýlet qurylysymen aınalysatyn mamandar bar. Aqtóbe qalasynyń ákimdigi jer máselesin sheshýge kirisse, jumys toby teatr jobasymen aınalysyp jatyr. Jaqyn kúnderi bir toqtamǵa kelip, kópshilikke jańa teatrdyń qandaı bolatynyn, qaıda ornalasatynyn habarlaımyz. Bıyl qurylys jumystary bastalyp, keler jyly qoldanysqa beriledi. Budan ózge oblys ortalyǵynda Ortalyq stadıon salý máselesin qarastyryp jatyrmyz. Teatr salýǵa shamamen 10-15 mlrd teńge jumsalady. Al 30 myń oryndyq ári UEFA talaptaryna saı stadıon qurylysy úshin 50-70 mlrd teńge ınvestıtsııa qajet bolady. Qazirgi kezde 5-6 ınvestor nıet bildirdi. Bastysy – bıýdjetke salmaq túsirmeý. Oıymyz fýtboldy odan ári damytý ǵoı. Qala óskende suranystyń artatyny zańdylyq. Tipti 50 myń bıletke deıin suranys bolǵan kez de kezdesedi. Stadıon shamamen 30 myńdyq bolsa, barlyq jankúıer súıikti komandany qoldaýǵa múmkindik alady. Bılet baǵasynda kóp ózgeris bolmaıdy dep esepteımiz, sebebi ınvestor qyzmet kórsetý salasyn qatar alyp júredi. VIP kabınalar da usynylady. Múgedektigi bar adamdardyń fýtbol kórýine jaǵdaı jasalady. Bárin jan-jaqty oılastyryp, utymdy sheshim qabyldaımyz. Tek «Aqtóbe» FK oıyndaryn emes, túrli halyqaralyq jarystardy osynda ótkizgimiz keledi.
- Ánshi Dımash Qudaıbergen – qazaq maqtanyshy ári Aqtóbeniń týmasy. Jyl saıyn jankúıerleri týǵan jerine kelip, tanysyp ketedi. Bul týrızmdi damytýdyń bir joly ekeni anyq. Qandaı týrmarshrýt usynylady?
- Óńirde týrızmdi damytý maqsatynda ashylǵan «Visit Aktobe» ortalyǵy jumys isteıdi. Byltyr jyl sońynda Aqtóbe oblysynyń delegatsııasy kóshpeli Road Show is-sharasy aıasynda QHR (Pekın jáne Shanhaı), sondaı-aq Koreıa Respýblıkasynyń Seýl qalalaryna bardy. Bul sharanyń basty taqyryby Dimash Tour tanystyrylymy boldy. Shara barysynda delegatsııa ókilderi Aqtóbe oblysynyń týrıstik múmkindikterin, ásirese tanymal oryndaýshy Dımash Qudaıbergenovtiń shyǵarmashylyǵy men ómirine qatysty týrlardy nasıhattady. Dimash Tour Aqtóbede týrızm ındýstrııasynyń damýyna aıyryqsha yqpal etedi. Meıramhanalar, qonaq úıler jáne dúkender týrıster aǵynynyń artýynan zor paıda kóre alady. Bul óz kezeginde aımaqtyń ekonomıkalyq damýyna septigin tıgizýi múmkin.
Qazirgi kezde kópshilikti Dımash Qudaıbergenniń ómir tarıhy qyzyqtyrady. Ózińiz aıtqandaı, sheteldik jankúıerleri Aqtóbege keledi, sonyń ishinde bilim alǵan mektebi men mýzykalyq kolledjge barady. Jyl saıyn Shveıtsarııa, Kanada, Norvegııa, Ulybrıtanııa, Qytaı jáne t.b. elderden 100-den astam týrıst keledi. Olar úshin óńirdi tanymal etýge baǵyttalatyn ekskýrsııalar arnaıy uıymdastyrylady. Al Dımash Qudaıbergenniń ózine keler bolsaq, biz ony qabyldaýǵa daıyn bolýymyz kerek. Ol shyǵatyn alańǵa jaǵdaı jasaýymyz qajet.
Sondaı-aq Aqtóbe oblysy boıynsha týrızmniń birneshe salasy damyǵan. Ekologııalyq týrızm boıynsha 12 marshrýt bar. Olardyń ishinde Aqtolaǵaı borly taýlary, Aqqum qumdary (Baıǵanın aýdany), Qarǵaly sý qoımasy, Qasqyr sarqyramasy, Mylqaý aýyl (Qarǵaly aýdany), Aqqaıyń ormany (Mártók aýdany), Orqash tabıǵı qoryǵy (Muǵaljar aýdany), Barqyn qumdary (Oıyl aýdany), Yrǵyz-Torǵaı tabıǵı rezervaty (Yrǵyz aýdany) týrıstik obektileri óńir turǵyndary men qonaqtary arasynda tanymal. Oblys boıynsha qasıetti sanalatyn tarıhı-mádenı eskertkishterge arnalǵan týrıstik marshrýttar da uıymdastyrylǵan. Sonymen qatar óndiristik týrızm damyp keledi. Aqtóbe ferroqorytpa zaýyty men «AIS» sút kompanııasy osy baǵytqa ıkemdi.
- Siz memlekettik qyzmetker ǵana emes, kásibı sportshysyz. Osy salada qaı baǵytqa basymdyq berý kerek dep esepteısiz? Óńirde sporttyń qaı túrin damytqan jón?
- Birinshi kezekte olımpıadalyq sport túrlerin damytýǵa kúsh salynady. Bizdiń óńirge tán, bizdiń sportshylardyń tabıǵatyna keletin sport túrleri bar. Olar: fýtbol, dzıýdo, júzý, grek-rım kúresi, erkin kúres, boks, taekvondo WT, voleıbol jáne ústel tennısi. Sonymen qatar, árıne ózimizdiń ulttyq sport túrlerine jáne olımpıadalyq emes buqaralyq keń damyǵan sport túrlerine basymdylyq beriledi. Buqaralyq sport túrlerin atap aıtsaq, shahmat, sambo, fýtzal, karate, taekvondo, prezıdenttik kópsaıys jáne t.b. sport túrleri bar.
- Ózińiz qazir sportpen shuǵyldanyp júrsiz be?
- Bastaımyn. Alǵash kelgen kezde problemalyq suraqtardy qalaı sheshemin degen oı boldy. Tórt aı boıy den qoıyp, jan-jaqty talqylaý júrgizdik. Jattyǵý da mańyzdy ekenin túsinemin. Sebebi sportshy bolǵan soń, bizdiń júregimiz basqasha jumys isteıdi, kúnine 7-8 saǵat jattyǵý ótkizetinbiz. Keıin kún tártibi ózgerdi. Ol júrekke keri áserin tıgizedi, salmaq túsiredi.
- Problemalyq suraqtar demekshi, aýdandardy aralaǵanda qurylysy aıaqtalmaǵan kóp áleýmettik nysan boldy. Bıyl sol nysandar iske qosyla ma?
- Aýdan, aýyldardaǵy problemalyq suraqtardyń bárin bıylǵy josparǵa engizdik. Oǵan qosymsha birneshe joba usynyldy. Ásirese kireberis joldar salý nazarda bolady. Kóp aýdan, aýylda 20-30 shaqyrymdyq jol qalyp qoıǵan eken. Aýdandardaǵy joldardy jóndeýge bıyl 26 mıllıard teńge bólindi. Sheshilmeıdi, qıyn degen másele joq. Qazir keıbir jobanyń jobalyq-smetalyq qujatyn qaıta ázirlep jatyrmyz.
- Bári oń sheshilgenin tileımiz. Suhbatyńyzǵa rahmet.