Jármeńke: Qostanaı oblysy astanaǵa 50 tonna et alyp keledi

NUR-SULTAN. QazAqparat - 16-17 qazan kúnderi Nur-Sultanda Qostanaı oblysynyń aýylsharýashylyq jármeńkesi ótedi, dep habarlaıdy QazAqparat.

Elorda ákimdiginiń resmı saıtynda málim etilgendeı, jármeńke «Han Shatyr» saýda, oıyn-saýyq ortalyǵynyń janyndaǵy alańda ótedi.

Eki kún ishinde oblystyń 14 aýdany men 3 qalasynan 50-den astam kásiporyn óz ónimderin usynady. Onyń ishinde: Altynsarın, Áýlıekól, Denısov, Jitiqara, Qarabalyq, Qarasý, Qamysty, Qostanaı, Meńdiqara, Naýryzym, Sarykól, Taran, Fedorov, Uzynkól aýdandary jáne Arqalyq, Rýdnyı, Qostanaı qalalary bar.

Oblys kásiporyndary 270 tonna kóleminde 100-den astam ónim túrlerin: 50 tonna et, 31 tonna sút ónimderi, 20 tonna shujyq ónimderi men jartylaı fabrıkattar, 27 tonna jarma men makaron ónimderi, 60 tonna kartop pen kókónis, 20 tonna un ónimderin alyp keledi.

Sondaı-aq, satylatyn ónimderdiń assortımentine nan-toqash, kondıterlik ónimder, bal jáne basqalar kiredi.

Baǵalar naryqtyq baǵadan 10-15% tómen bolady.

Aıta keteıik, bıyl elordada áleýmettik mańyzy bar azyq-túlik ónimderiniń baǵasyn turaqtandyrý maqsatynda kókónister men jemisterdiń pisý merzimin eskere otyryp, 14 jármeńke ótkizý josparlanǵan. Olar 31 qazanǵa deıin jalǵasady.

21 tamyzdan bastap búginge deıin astanaǵa Túrkistan, Batys Qazaqstan, Shyǵys Qazaqstan, Qyzylorda, Almaty, Atyraý, Jambyl, Aqtóbe, Qaraǵandy, Pavlodar jáne Mańǵystaý oblystarynyń aýylsharýashylyq taýar óndirýshileri jármeńkemen kelgen bolatyn.