Jarkentte mektep muǵalimi áriptesiniń kóligin urlady degen kúdikke ilindi

JARKENT. QazAqparat - Jetisý oblysynda dene shynyqtyrý pániniń muǵalimi óz áriptesiniń avtokóligin urlady degen kúdikke ilindi, dep habarlaıdy QazAqparat.

Polıtsııa málimetinshe, bul fakt Jarkent qalasynda tirkelgen.

6 sáýirde aýdandyq polıtsııaǵa Mazda-626 kóligi urlanǵany habarlandy.

Kóliktiń ıesi mektep muǵalimi bolyp shyqty, ol baıqaýsyzda kiltti kólikte qaldyrǵan, sony belgisiz adam paıdalanyp, ony aıdap ketken.

Іzdeý sharalary barysynda patrýldik polıtsııa qyzmetkerleri urlanǵan kólikti qala shetindegi úılerdiń birinen taýyp, zańdy ıesine qaıtardy.

Kúdikti de jábirlenýshini sııaqty bilim mekemesiniń qyzmetkeri, onyń áriptesi bolyp shyqty. Jergilikti mektepterdiń birinde dene shynyqtyrý páninen sabaq beredi.

Іs boıynsha tergeý amaldary QR QK 200-babyna sáıkes júrgizilip jatyr.