Jarqaıyń mýzyka mektebinen 600-ge jýyq dombyrashy túlep ushqan

KÓKShETAÝ. QazAqparat - Aqmola oblysynyń Jarqaıyń aýdanynda ulttyq qundylyǵymyz, rýhanı baılyǵymyz - qasıetti dombyramyzdy jas urpaqqa úıretý jumysy júıeli júrgizilýde, dep habarlaıdy QazAqparat tilshisi Aqmola oblystyq Іshki saıasat basqarmasyna silteme jasap. 

Qazaq - qaıda júrse de, qolynan qasıetti qara dombyrasyn tastamaǵan halyq. Kóńiliniń kúıin kúmbirlegen kúı arqyly uqtyryp, áýelegen áýezdi ánmen áspetteı bilgen. Qurmanǵazy men Dına, Dáýletkereı men Táttimbetter janyna serik etken asyl muramyzdy búginde qaıta jańǵyrtý maqsatynda Jarqaıyń aýdanynda «Balalar mýzyka mektebi» jumys jasap keledi.

Ult mádenıetiniń máıegi sanalatyn saz aspabyn nasıhattaý sharasy boıynsha aýdandyq, oblystyq baıqaýlarǵa qatysyp júrgen jas talanttar - osynyń kýási. Elý jyldyq tarıhy bar bul bilim ordasyn osynaý shırek ǵasyr ishinde 600-ge jýyq túlek támamdaǵan. Búgingi kúni dombyra synybynda 47 jas shákirt bilim alýda.

 «Dombyrasyz án qaıda, dombyrasyz sán qaıda?» nemese «Naǵyz qazaq - qazaq emes, naǵyz qazaq - dombyra!». Bul - burynǵynyń maqaly. Búginginiń maqamy - batystyq azan-qazan, dańǵyr-duńǵyr mýzyka ekenin eshkim de joqqa shyǵarmaıdy. Shyny kerek, dombyra shanaǵynan tógilgen shejireli kúı sheteldik shýly áýenniń tasasynda qalyp qoıyp jatyr.  Sondyqtan, atadan mıras bolǵan ónerimizdiń órisin keńeıtý turǵysynda Jarqaıyń aýdanynda 45 jyldan astam ýaqyt, óneri men ómirin kıeli aspapty jas urpaqqa úıretýge arnaǵan ardager aǵamyz Ahmetov Amanjol Taljanuly jaıly aıta ketýge mindettimiz. Osy ýaqytqa deıin Amanjol aǵamyz 420 shákirtke dombyra úıretip, Qurmanǵazy, Qazanǵap, Táttimbet, Dáýletkereıdiń kúılerin jas urpaq sanasyna sińirdi. Amanjol aǵamyzdyń daryndy shákirtteriniń biri, aýdandyq balalar mýzyka mektebiniń túlegi Ál-Farabı Qaıdaýlov Astana qalasyndaǵy mýzyka akademııasynyń ult aspaptary bólimin bitirip, qazirgi ýaqytta Qazaq óner ýnıversıtetinde sımfonııalyq dırıjer mamandyǵy boıynsha oqýyn jalǵastyrýda.

"Ál-Farabı - Astana qalasynda ótken qysqy Azııa oıyndarynyń ashylý saltanatynda, Berlın qalasynyń fılarmonııasynda ótkizilgen «Qazaq eli klassık» kontserttik baǵdarlamasynda óz ónerin kórsetken dara talanttarymyzdyń biri. 2018 jyly ótken Respýblıkalyq «Men qazaqpyn» baıqaýyna qatysyp, oblysta ótken gala-kontsertte kópshilikti ónerimen tánti etti", - deıdi ishki saıasat basqarmasyndaǵylar.