Jarylǵysh bar dep jalǵan habarlama bergen qyzylordalyq 3 jylǵa sottaldy
Kóliktegi polıtsııa departamentine qarasty ekstremızmge qarsy is-qımyl basqarmasynyń bastyǵy Dýlat Dirkenovtyń aıtýynsha, 2024 jyly QR Qylmystyq kodeksiniń 273-baby, ıaǵnı «Terrorızm aktisi týraly kórineý jalǵan habarlaý» boıynsha 33 fakti tirkelgen.
Máselen, kólik polıtseıleri Qyzylorda oblysynyń 32 jastaǵy turǵynyn anyqtap, ustady. Masań kúıde bolǵan ol Astana-1 stantsııasynyń temirjol vokzaly ǵımaratynda jarylǵysh qurylǵy (bomba) salynǵany týraly habarlaǵan.
- Tekserý barysynda eshqandaı jarylǵysh qurylǵylar tabylǵan joq. Atalǵan derek boıynsha sotqa deıingi tergeý júrgizildi. Astana qalasynyń qylmystyq ister jónindegi aýdanaralyq soty quqyqbuzýshyny 3 jylǵa bas bostandyǵyn shekteýge úkim shyǵardy jáne barlyq shyǵyndardy óteýge mindettedi. Úkim zańdy kúshine endi. Jalpy memlekettik organdardyń qabyldap jatqan sharalaryna qaramastan, áli de polıtsııaǵa terrorızm aktisi týraly kórineý jalǵan habarlamalar kelip túsýde. Sonymen qatar, jalǵan terrorıster mundaı qońyraýlardyń saldary qanshalyqty aýyr ekenin túsinbeıdi, - delingen Kóliktegi polıtsııa departamentiniń baspasóz qyzmeti usynǵan aqparatta.
Esterińizge sala keteıik, QR Qylmystyq kodeksiniń 273-baby «Terrorızm aktisi týraly kórineý jalǵan habarlama» boıynsha bes myń aılyq eseptik kórsetkish mólsherinde aıyppul salý ne sol mólsherde túzeý jumystaryna ne bes jylǵa deıingi merzimde bas bostandyǵyn shekteý ne sol merzimge bas bostandyǵynan aıyrý túrindegi jaza qarastyrylǵan.
Sonymen qatar, jalǵan terrorıster sot sheshimimen oqıǵa ornyna jumyldyrylǵan jedel áreket etý qyzmetteriniń barlyq shyǵyndaryn tolyq kólemde óteıdi.
Aıta keteıik, Túrkistan ákimdigi kásipkerge 27 mln tenge turaqsyzdyq aıybyn tóledi.