Jarylǵapov týrnıri: Chempıondar anyqtaldy
17 jeltoqsan kúni jalaýy jelbiregen dodanyń búgin kil myqtylary tolyǵymen anyqtaldy.
Atap aıtsaq, erler arasynda 48 keli salmaqta Temirtas Júsipovke teń keler eshkim bolǵan joq.
51 keli salmaqta chempıondyq beldik kýbalyq boksshyǵa buıyrdy. Fınalda shymkenttik Ryshan Tálippen judyryqtasqan Jıovıs Salfran qazaq ulanynan aılasyn asyryp ketti.
54 keli keli salmaqta qaraǵandylyq Karım Serkebaev óziniń teńdessiz ekenin dáleldese, 57 keli salmaq sanatynda Orazbek Asylqulov top jardy. Al 60 kelide Talǵat Syrymbetov kósh bastady.
63,5 keli salmaq sanatynda fınalda aqmolalyq boksshy Muhammedáli Sydyq kýbalyq Erıslandıǵa jol berdi. 67 keli salmaqta da kýbalyq boksshynyń juldyzy jandy. Túrkistandyq boksshymyz Ábdiǵalym Ábdikárim sheshýshy synda Jaıro Ramırestan aılasyn asyra almady.
71 keli salmaqta Sabyrjan Aqqalyqov qarsylas shaq keltirgen joq. 75 keli salmaqta Marokodan kelgen boksshy ıAsın Elovarz jeńiske jetti. Ol fınalda astanalyq Baqbergen Álıasqarovty utyp ketti.
80 keli salmaqta kýbalyq Joj Manýeel Soto jerlesimiz Bekbolat Ábdikerimnen aılasyn asyrdy. 86 kelide Almaty oblysynyń ókili Erkebulan Ákimbaı chempıon atansa, 92 keli salmaqta Saǵyndyq Toǵambaıǵa teń keler eshkim bolmady. Al asa aýyr salmaqta taǵy bir jerlesimiz Amanat Sabyrǵalı top jardy.
Áıelder arasynda 50 keli salmaqta bas júldeni Nazym Qyzaıbaı enshilese, 54 kelide 1- oryndy - Ánel Saqysh jeńip aldy. 57 kelide chempıondyq ataqqa jerlesimiz Rano Parhatovamen talasqan marokkolyq Vıdad Bertal jetti.
60 keli salmaqta bas júldeni Rımma Volosenko ıelense, 66 keliniń altyn júldesin túrkııalyq boksshy Sýrmenalı Býsenaz qanjyǵasyna baılady.
Áıelder arasyndaǵy aýyr salmaqta (75 keli) astanalyq boksshy Valentına Halzova chempıon atandy.
Aıta keteıik, Ǵalym Jarylǵapov 1939 jyldyń 22 jeltoqsanynda dúnıege kelgen. Sportty serik etken tulǵa qazaq boksynyń naǵyz janashyry bolǵan. Qazaq KSR-iniń eńbek sińirgen bapkeri men sport sheberi ataqtaryna qol jetkizgen. Keıin bylǵary qolǵabyn sheshkennen keıin de sharshy alańnyń aınalasynan alystaı almaǵan.
Bapkerlikten bastap, oblystyq týrızm jáne sport komıtetiniń basshysy dárejesine deıin kóterilgen. 1984 jyly Tashkentte KSRO halyqtarynyń spartakıadasy uıymdastyrylyp, oǵan Qazaqstannyń ókili retinde Ǵalym Jarylǵapov ta qatysqan. Sol jarysta bilikti bapker jekpe-jekte sharshy alańnyń janynda qazaq boksshylaryna jankúıer bolyp otyrǵanda júregi ustap, kóz jumǵan.
Al eki jyldan keıin, ıaǵnı 1986 jyly uly Nurǵazy Jarylǵapov alǵash ret osy týrnırdi ótkizýdi qolǵa alǵan. Sodan beri doda dástúrli túrde jyl saıyn uıymdastyrylyp keledi. Bıyl XXXIX márte ótti.
Esterińizge sala keteıik, osyǵan deıin fınalǵa kimderdiń shyqqanyn jazǵan bolatynbyz.