Jaryq pen tamaq joq: Izraıl Gazany tolyq oqshaýlaǵanyn málimdedi

<p>Izraıl Qorǵanys mınıstri Ioav Gallant Gazanyń tolyq oqshaýlanǵanyn málim etti. Ol jaqta qazir jaryq, taǵam jáne otyn joq. Izraıl HAMAS lańkestik tobymen kúresip jatqandyqtan Qorǵanys mınıstri osyndaı buıryq bergenin málimdedi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń menshikti tilshisi.&nbsp;</p>

«Men Gaza sektoryn tolyqtaı oqshaýlaýǵa buıryq berdim. Jaryq, taǵam, otyn da bolmaıdy, bári jabyq», - dep málim etti Gallant TsAHAL Ońtústik qolbasshylyǵy Beer-Shevte júrgizgen baqylaýdan keıin.

Izraıl áskeri Gaza sektorynda qorshaýǵa alynǵan eki qashqyndar lageri – Djabalııa men Ash-Shatıge áýeden soqqy jasady. Al-Shatı meshiti de jaryldy. Jaraqat alǵan ondaǵan adam Gaza qalasyndaǵy negizgi Ash-Shıfa aýrýhanasyna jetkizildi.

Senbi kúni palestınalyq HAMAS toby Izraılge shabýyl jasap, el soǵys jaǵdaıyna kóshkennen keıin birqatar memleket azamattaryn Izraılden evakýatsııalaýdy uıymdastyrǵanyn eske sala keteıik.

Izraıl áskeriniń resmı ókili dúısenbi tańerteń qazirgi ýaqytta barlyq eldi mekendi baqylap otyrǵanyn, Izraıl aýmaǵynda áskerı is-qımyl bolyp jatpaǵanyn málim etti. Degenmen ol Izraıl aýmaǵynda áli de Hamas áskeri bolýy múmkin deıdi.

Búgin HAMAS Tel-Avıvtegi áýejaıǵa zymyran ushyrǵany belgili boldy.