Járdemaqylardyń mólsheri eń tómen kúnkóris deńgeıine baılanysty bolady – mınıstrlik

NUR-SULTAN. QazAqparat – Qazaqstandyqtarǵa múgedektik jáne asyraýshysynan aıyrylý boıynsha járdemaqy túrinde 130 mlrd teńgeden astam qarajat tólendi. Bul týraly QazAqparat Eńbek jáne halyqty áleýmettik qorǵaý mınıstrligine silteme jasap habarlaıdy.

2021 jylǵy qańtar-sáýir aılary aralyǵynda respýblıkalyq bıýdjetten múgedektigi boıynsha memlekettik áleýmettik járdemaqy tóleýge 102,8 mlrd teńge, asyraýshysynan aıyrylý jaǵdaıyna 27,4 mlrd teńge baǵyttaldy.

2021 jylǵy 1 mamyrdaǵy jaǵdaı boıynsha múgedektigi boıynsha memlekettik áleýmettik járdemaqy alýshylardyń sany 525,1 myń adamdy, asyraýshysynan aıyrylý jaǵdaıy boıynsha 169,6 myń adamdy quraıdy.

Múgedektigi boıynsha memlekettik áleýmettik járdemaqylardyń mólsheri múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilenetin eń tómen kúnkóris deńgeıiniń shamasyna baılanysty bolady.

Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan (qaza tapqan) asyraýshysynyń asyraýyndaǵy adamdardyń sanyna, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilenetin eń tómen kúnkóris deńgeıiniń shamasyna baılanysty bolady.

2021 jylǵy 1 mamyrdaǵy jaǵdaı boıynsha múgedektigi boıynsha memlekettik áleýmettik járdemaqynyń ortasha mólsheri 49 150 teńgeni, asyraýshydan aıyrylý jaǵdaıy boıynsha memlekettik áleýmettik járdemaqynyń ortasha mólsheri 40 653 teńgeni qurady.