Járdemaqydan bızneske deıin: Qostanaılyq AÁK arqyly óz isin ashty

NUR-SULTAN. QazAqparat - Memleket tarapynan ataýly áleýmettik kómek alatyn Qostanaı oblysyndaǵy kópbalaly ana otbasynyń materıaldyq jaǵdaıyn jaqsartyp qana qoımaı, jeke isin de uıymdastyrdy. Bul jaıynda QR Eńbek jáne halyqtyáleýmettik qorǵaý mınıstrliginen málim etti, dep habarlaıdy QazAqparat tilshisi.

Vedomstvo málimetinshe, Janar Kýjenova AÁK taǵaıyndaýdan túsken qarajatqa aýdan ortalyǵynyń shetinde shaǵyn sulýlyq stýdııasyn jalǵa aldy. Janardyń oıynsha, jeke kásippen aınalysý memleketten únemi áleýmettik kómek alǵannan góri jaqsy.

«Meniń tórt balam bar. Kenje qyzym 2,5 jasta. Meniń kúıeýim qurylysshy bolyp jumys istedi. Onyń jalaqysy bizge jetpedi, ásirese qysta jumys bolmady. Sondyqtan men AÁK taǵaıyndaý úshin qujattar jınaı bastadym. Keıin men «Bastaý Bıznes» jobasy týraly bildim jáne qysqa merzimdi kýrstarda kásipkerlik negizderin oqydym. 26 maýsymda mende permamentti makııaj qyzmetin usyný úshin jeke bıznesimdi ashý úshin grant alý múmkindigi paıda boldy. «Sen - Sulu» sulýlyq stýdııasyn ashtym. Men aýyldastarymnyń jyly pikirlerine óte qýanyshtymyn, meniń stýdııam týraly aýyzsha jarnamany kórshi Kamyshınskoe, Aıatskoe aýyldarynyń áıelderi estip, kele bastady. Kún saıyn 7-8 klıentke qyzmet kórsetemin. Ár áıel, kez-kelgen jasta, sulý bolǵysy keledi», - dedi jetistigimen bólisken Janar.

Qostanaı oblysy Jumyspen qamtý jáne áleýmettik baǵdarlamalar basqarmasynyń ókili Lıdııa Tsymbal 2019 jyldyń birinshi toqsanynda Janar Kýjenova 3 jasqa deıingi bala kútimine baılanysty demalysta bolǵanyn aıtady. Jubaıy jeke tulǵalarda beıresmı jumys istedi.

«Otbasynyń tabysy kedeılik sheginen tómen boldy (bir adamǵa jan basyna shaqqandaǵy ortasha tabysy 8772 teńge), sondyqtan 2019 jyldyń sáýirinen bastap otbasyna aı saıyn 110 myń 157 teńge kóleminde ataýly áleýmettik kómek taǵaıyndaldy. Jalpy somasy - 1 mln 321 myń 884 teńge. Aǵymdaǵy jyldyń sáýir aıynda otaǵasyn «Stroı master» JK-ge ártúrli jumystardy oryndaıtyn jumysshy qyzmetine turaqty jumysqa ornalastyrýǵa múmkindigi týdy» - dep eske alady Lıdııa Tsymbal.

Esterińizge sala keteıik, búgingi kúni AÁK 2 mln 87 myń 400 qazaqstandyqqa (405 myń 600 otbasy), onyń ishinde 1 mln 302 myń 500 balaǵa (olardyń úlesi barlyq alýshylardyń 62,4 paıyzyna teń) taǵaıyndaldy. Alýshylar quramyndaǵy kópbalaly otbasylar shamamen 40 paıyzdy quraıdy (161,6 myń otbasy nemese 1 mln 71,6 myń adam).

AÁK alýshylardyń eń kóp sany eldiń ońtústik óńirlerine keledi. Onda barlyq alýshylardyń 67 paıyzdan astamy shoǵyrlanǵan. Onyń ishinde Túrkistan oblysynda – 96 myń 800 otbasy, Almaty oblysynda – 53 myń 600 otbasy, Shymkent qalasynda – 51 myń 600 otbasy, Jambyl oblysynda – 39 myń otbasy jáne Qyzylorda oblysynda-31 myń 700 otbasy.

2019 jyly AÁK tóleýge 204 mlrd 500 mln teńge qarastyrylǵan, onyń ishinde 186 mlrd 100 mln teńge respýblıkalyq bıýdjetten jáne 18 mlrd 400 mln teńge jergilikti bıýdjetten. 144 mlrd 300 mln teńge tólendi.