Járdemaqy úshin banktiń jeke sáıkestendirý kodyn alý tártibi jeńildetilmek

ASTANA. QazAqparat – Memleket tarapynan járdemaqy alýǵa ótinish bildirgen azamattar endi banktiń jeke sáıkestendirý kodyn óziniń tikeleı qatysýynsyz asha alady. Bul týraly ashyq talqyǵa shyǵarylǵan Ulttyq bank qaýlysynda kórsetilgen, dep habarlaıdy QazAqparat tilshisi.

«Járdemaqylar men áleýmettik tólemderdi tóleý maqsatynda klıent atyna jeke sáıkestendirý kodyn ashý klıenttiń ýákiletti organǵa bergen ótinishi negizindegi málimet boıynsha júzege asyrýyna jol beriledi. Bul qyzmet klıenttiń qol qoıýyn talap etpeıtin bank shotyn ashý týraly ótinishine teńestiriledi», - dep kórsetilgen qujatta.

Endi azamat memleket tarapynan beriletin járdemaqyny alý úshin jergilikti ýákiletti organǵa júginip, tısti qujattardy tapsyrady. Tıisinshe, ol usynǵan aqparattardy quzyrly organ bankke jeke sáıkestendirý kodyn ashý úshin joldaıdy. Osylaısha, azamattyń bul protsesske tikeleı qatysyp, qol qoıýy mindetti bolmaıdy. Degenmen, ótinish maquldanyp, járdemaqy taǵaıyndalsa, onda klıent óziniń shotyna túsken aqshany birden paıdalana almaıdy. Ol úshin azamat bankpen qyzmet kórsetý shartyn jasasýy qajet. Osydan keıin qarjy operatsııalary fýnktsııasyn qoldana alady.