1 qańtardan bastap járdemaqy men zeınetaqy qanshalyqty ulǵaıdy

<p>2024 jyldyń 1 qańtarynan bastap elimizde járdemaqylar men zeınetaqy mólsheri artty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Atap aıtqanda, 2024-2026 jyldarǵa arnalǵan respýblıkalyq bıýdjet týraly zańda 2024 jylǵy 1 qańtardan bastap memlekettik járdemaqy men bazalyq zeınetaqynyń barlyq túrin Ulttyq bank aıqyndaıtyn ınflıatsııanyń boljamdy deńgeıine sáıkes — 7, yntymaqty zeınetaqyny — 9 paıyzǵa, ıaǵnı ınflıatsııa deńgeıinen 2 paıyzǵa ilgerilep arttyrý kózdelgen.

2024 jyly bıýdjetten tólenetin jıyntyq zeınetaqynyń ortasha mólsheri (BJZQ tólemderin eseptemegende) — 130 414 teńge (2023 jyly — 120 838 teńge).

Budan basqa, Memleket basshysynyń tapsyrmasy boıynsha 2023 jyldan bastap bes jyl ishinde eń tómen bazalyq zeınetaqy eń tómen kúnkóris deńgeıiniń 70 paıyzyna deıin, eń joǵary deńgeıi 120 paıyzǵa deıin jyl saıyn kezeń-kezeńimen artady.

Máselen, 2024 jylǵy 1 qańtardan bastap bazalyq zeınetaqynyń eń tómen mólsheri eń tómen kúnkóris deńgeıinen 60-tan 65 paıyzǵa deıin ulǵaıady.

Bul — 28 215 teńge, al eń joǵary mólsheri eń tómen kúnkóris deńgeıinen 100-den 105 paıyzǵa deıin artyp, 45 578 teńge boldy.

2024 jylǵy 1 qańtardan bastap memlekettik járdemaqy:

— 1, 2, 3 balanyń týýyna beriletin járdemaqy 131 100 teńgeden 140 296 teńgege deıin, 4 jáne odan da kóp bala týýyna beriletin járdemaqy — 217 350 teńgeden 232 596 teńgege deıin;

— mólsheri balalar sanyna baılanysty kópbalaly otbasylarǵa beriletin járdemaqy 4 balasy bar otbasylar úshin 55 304 teńgeden 59 183 teńgege deıin, 10 balasy bar otbasylar úshin — 138 000 teńgeden 147 680 teńgege deıin;

— I top múgedektigi bar adamdarǵa arnalǵan járdemaqy 89 248 teńgeden 95 496 teńgege deıin, II top — 71 398 teńgeden 76 397 teńgege deıin, III top — 48 681 teńgeden 52 089 teńgege deıin ulǵaıtyldy.

Sondaı-aq, Memlekettik áleýmettik saqtandyrý qorynan asyraýshysynan aıyrylý jáne eńbekke qabiletinen aıyrylý boıynsha tólem 7 paıyzǵa artty.

Atalǵan tólemder mindetti áleýmettik saqtandyrý júıesine qatysýshylarǵa bıýdjetten beriletin memlekettik járdemaqylarǵa qosymsha júzege asyrady.

Tólem mólsheri jeke-jeke jáne mynalarǵa baılanysty bolady: sońǵy 2 jylda Memlekettik áleýmettik saqtandyrý qoryna áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffıtsıentteri, asyraýyndaǵy adamdar sany, mindetti áleýmettik saqtandyrý júıesine qatysý ótili jáne tabysty almastyrý.