Jappaı ýlanǵan balalar: 6 myń mekteptiń ashanasyn teksergen mamandar kóp kemshilik tapty

<p>ASTANA. KAZINFORM — Sanıtarııalyq-epıdemıologııalyq baqylaý komıtetiniń mamandary bilim basqarmasy qyzmetkerlerimen birge eldiń túkpir-túkpirinde mektep ashanalaryn tekserip júr. </p>

Olar ashanada sanıtarııalyq-epıdemıologııalyq talaptardyń saqtalýyna jáne oqýshylardyń tamaqtaný sapasyna monıtorıng jasaıdy. 

Sanıtarııalyq-gıgıenalyq jaǵdaı monıtorıngi 6 225 obektini, onyń ishinde 5 961 mektep as blogy jáne 264 býfetti qamtydy.

«Monıtorıng barysynda ystyq sýdyń joqtyǵy, as blogy qyzmetkerleriniń arnaıy kıim kııý erejelerin saqtamaýy, jeke gıgıena erejelerin saqtaý úshin qaǵaz súlgiler men quraldardyń bolmaýy, jınaý qural-saımanynda tańbalaýdyń joqtyǵy, tamaq ónimderin saqtaý merzimin buzý sııaqty birqatar kemshilikter anyqtaldy. Budan basqa, ónimniń qaýipsizdigin rastaıtyn tıisti sáıkestik qujattar joq bolyp shyqty» deıdi komıtetten.

Sondaı-aq alkogolsiz gazdalǵan sýsyndardy, fast-fýdty satý, dezınfektsııalyq, aýyz sý rejıminiń buzylýy, sondaı-aq jeldetý júıesiniń jaramsyzdyǵy áshkere bolǵan. 

Anyqtalǵan búkil zańbuzýshylyqtar boıynsha tıisti jumys júrgizildi.

Eske salaıyq, 6 qyrkúıekte Mańǵystaýdyń Munaıly aýdany Besshoqy aýylynda bir mekteptiń 500-ge jýyq oqýshysy astan ýlanyp qaldy.

Olardyń barlyǵy mektep ashanasynda tegin ystyq tamaq ishkennen keıin aýyrǵan.

Osy oqıǵadan keıin búkil el boıynsha mektepterdiń ashanasy tekseriletin boldy.

Oqý-aǵartý mınıstri Ǵanı Beısembaev Mańǵystaýda balalardyń tamaqtan ýlanýyna jol bergender jazalanatynyn habarlady.

Keıinnen Mańǵystaý oblysynyń Beıneý aýdanynda 16 bala tamaqtan ýlandy.