Jappaı tártipsizdikterden keıin Almaty áýejaıynyń kelbeti qandaı - fotoreportaj

ALMATY. QazAqparat – Almatyda jappaı tártipsizdikter saldarynan ákimshilik jáne saýda ǵımarattarymen qatar, halyqaralyq áýejaıy da zardap shekti. Ony búlikshiler basyp aldy, nysan keıinnen arnaıy operatsııa kezinde bosatyldy. 13 qańtardan bastap áýe aılaǵy óz qyzmetin qaıta bastady, al 19 qańtardan shtattyq rejımde jumys isteıdi. QazAqparat fototilshisi qaıta qalpyna keltirý jumystary júrgizilgen áýejaıda bolyp qaıtty.

Halyqaralyq áýejaıdyń baspasóz qyzmetiniń jetekshisi Naılıa Jabagına búginde ǵımaratty qalpyna keltirý aıaqtalǵanyn, ishki árleý jumystary qalǵanyn aıtty. «Áýejaı búginnen bastap shtattyq rejımde jumys isteıdi. Qaıǵyly oqıǵalarǵa deıin bolǵan ishki jáne halyqaralyq reısterdiń aǵymy birtindep qalpyna keltirilýde», - dedi ol.

Onyń aıtýynsha, búlikshiler 5 qańtar kúni Almaty halyqaralyq áýejaıyn basyp alǵan. Olar áýejaı ishine kirgen soń, jalǵa alýshylardyń býtıkterin qıratyp, áınekterdi syndyrǵan, beınekameralar ornalasqan serverlerge de zaqym keltirgen. Áýejaıǵa shabýyl jasalǵan tusta munda 1 myńǵa jýyq adam boldy. Olardyń barlyǵyna óz ýaqytynda evakýatsııa jasaldy.

«Áýejaıdy shabýyldaýǵa 40-50-ge jýyq adam kele jatyr degen aqparat túse salysymen bizde evakýatsııalaý jospary jasaldy. Sol boıynsha saǵat 19.30 shamasynda jolaýshylar men qyzmetkeler shuǵyl syrtqa shyǵaryldy, perron jaqta daıyn turǵan avtobýsqa otyrǵyzylyp, qaýipsiz jerge jetkizildi. Qudaıǵa shúkir, bizde zardap shekken jolaýshylar men qyzmetkerlerimiz bolǵan joq», - dedi Naılıa Jabagına.

Búlikshiler áýejaıdan 6 qańtar kúni saǵat tańǵy 4-ter shamasynda shyǵaryldy. Olar qıratyp ketken zattar birneshe kúnde qaıta qalpyna keltirildi.

«Áýejaıǵa shabýyl jasalǵan kezde ishte kúzet qyzmeti, áýejaıdyń aýysym bastyǵy qalǵan. Olar kelesi 5-6 kún boıy da áýejaıdan basqa eshqaıda ketpegen. Áýejaı basshylyǵy olardyń erlikterin eskerip, laıyqty marapattaryn usynatyn bolady», - dedi áýejaıdyń baspasóz hatshysy.

Qazirgi ýaqytta áýejaıǵa kelgen zalaldyń somasy eseptelýde. Áýejaı qaıta ashylǵan 13 qańtardan bastap shamamen 50 myń jolaýshyǵa qyzmet kórsetildi. Qazirgi ýaqytta áýejaı men termınalyna bıleti bar jolaýshylar ǵana jiberiledi.

Eske salsaq, Almatyda tótenshe jaǵdaı rejımi jáne komendanttyq saǵattyń aıaqtalýyna baılanysty búginnen bastap Almaty halyqaralyq áýejaıy shtattyq rejımde jumysyn júrgize bastady.