Jappaı tártipsizdik kezinde almatylyq dárigerler kúnine 145 operatsııa jasady

ALMATY. QazAqparat- Ortalyq qalalyq klınıkalyq aýrýhananyń qabyldaý bólimshesiniń meńgerýshisi Dáýlet Chýkmanov qalada tártipsizdik ornaǵan kezde qalaı jumys istegenderi týraly aıtyp berdi, dep habarlaıdy QazAqparat tilshisi.

«Patsıentter 5 qańtarda óte kóp boldy. Bul kúni túrli jaraqattarmen emdeý mekemesine 191 adam júgindi. Olardyń basym bóligi bas jáne keýde kletkasynyń aýyr jaraqatyn alǵan. Biz barlyq patsıentke barynsha kómek kórsettik. Aýrýhana qyzmetkerleri júkteminiń kóp ekenin túsinip bári jumysqa shyqty»,- deıdi ol.

Dárigerdiń sózinshe, patsıentterdiń jartysy shuǵyl medıtsınalyq kómek kórsetkennen keıin, ambýlatorlyq emdelýge jiberildi. Jaraqaty aýyrlar aýrýhanaǵa jatqyzyldy.

«Bul kúnderi 9 kezekshi brıgada juyms istedi. Qyzmetkerler táýlik boıy aýrýhanada boldy. Kúnine 145 operatsııa jasaldy. Jasyratyny joq bizdiń boıymyzda úreı boldy, atystyń daýsy, agressııaly patsıentter kelip jatty. Olar jalǵyz bolǵan joq. Olarmen ilesken adamdar boldy»,- dedi dáriger.

Ortopedııa bólimshesiniń meńgerýshisi Qanat Táýekelov bul kúnder óte aýyr bolǵanyn tilge tıek etti.

«Túrli synyqtarmen túsken patsıentter boldy. Syrttaı fıksatsııa, súıek synyǵyna Illızarov apparatyn saldyq. Óte aýyr boldy, kóptegen patsıentter súıek tinderiniń úlken aqaýlyǵymen tıpke jatpaıtyn zaqymdarmen tústi. Osy kúni demalysta bolǵan barlyq qyzmetkerlerdi jumysqa shaqyryp aldyq», - dep bólisti Qanat Táýekelov.

Búgnigi kúni emhana 24/7, ıaǵnı táýlik boıy jumysyn jalǵastyryp, Almaty qalasynyń turǵyndaryna shuǵyl josparly medıtsınalyq kómek kórsetýde.

«Kópshilik tártipsizdikten zardap shekkenderdiń arasynda arýhananyń medıtsına qyzmetkerleri joǵyna shúkir, aýrýhana ǵımaraty da zardap shekpedi»,- deıdi ol.