Jappaı deklaratsııalaý: Deklaratsııa tapsyrý merzimi aıaqtalýda
Bul týraly QR QM Memlekettik kirister komıteti eske saldy.
2021 jyldyń 1 qańtarynan bastap elimizde jalpyǵa birdeı deklaratsııany engizýdiń birinshi kezeńi bastalǵan bolatyn. Jalpyǵa birdeı deklaratsııalaýdy engizý tórt kezeńmen júrgiziledi.
«Birinshi kezeńde (2021 jyldyń 1 qańtarynan bastap) aktıvter men mindettemeler týraly deklaratsııany usyný boıynsha mindettemeler (250.00-nysan) jaýapty memlekettik laýazymdy atqaratyn adamdar men olardyń jubaılary (zaıyptary); memlekettik fýnktsııalardy oryndaýǵa ýákilettik berilgen adamdar men olardyń jubaılary (zaıyptary); memlekettik fýnktsııalardy oryndaýǵa ýákilettik berilgen adamdarǵa teńestirilgen adamdar men olardyń jubaılary (zaıyptary); Qazaqstan Respýblıkasynyń «Qazaqstan Respýblıkasyndaǵy saılaý týraly» Konstıtýtsııalyq Zańyna jáne Qazaqstan Respýblıkasynyń «Sybaılas jemqorlyqqa qarsy is-qımyl týraly», «Qazaqstan Respýblıkasyndaǵy bankter jáne bank qyzmeti týraly», «Saqtandyrý qyzmeti týraly», «Baǵaly qaǵazdar naryǵy týraly» Zańdaryna sáıkes deklaratsııa tabys etý mindeti júktelgen tulǵalarda týyndady», - dep habarlady MKK-de.
Jalpyǵa birdeı deklaratsııalaýdyń birinshi kezeńiniń deklaratsııasyn qaǵaz túrinde usyný merzimi 2021 jylǵy 15 shildede aıaqtalǵan bolsa, elektrondy túrde 2021 jylǵy 15 qyrkúıeginde aıaqtalady.
Aktıvter men mindettemeler týraly deklaratsııany elektrondy túrde Salyq tóleýshiniń kabıneti (cabinet.salyk.kz), «Elektrondy úkimet» portaly (egov.kz) arqyly, sondaı-aq «e-Salyq Azamat» jáne «eGov mobile» mobıldi qosymshalary arqyly tapsyrýǵa jaǵdaı jasalǵan.
«Aktıvterdi deklaratsııalaýǵa qatysty suraqtar týyndaǵan jaǵdaıda memlekettik kirister organdaryna nemese 1414 nómiri boıynsha, qosymsha 3 nómirin tere otyryp, baılanys ortalyǵyna habarlasýǵa bolady», - dep atap ótti MKK-de.
Sondaı-aq, QR QM Memlekettik kirister komıtetiniń resmı saıtynda (kgd.gov.kz) «Jalpyǵa birdeı deklaratsııalaý» bóliminde tolyq aqparatty alýǵa bolady.
Aktıvter men mindettemeler týraly deklaratsııany belgilengen merzimde usynbaǵan jaǵdaıda, ákimshilik jaýapkershilik kózdelgen. Birinshi ret ýaqytyly tapsyrylmaǵany úshin eskertý jasalady, eger osydan keıin buzýshylyq bir jyl ishinde qaıtalap jasalsa – 15 AEK mólsherinde aıyppul salynady.
Aktıvter men mindettemeler týraly deklaratsııada tolyq emes, anyq emes málimetterdi usyný úshin de ákimshilik jaýapkershilik qarastyrylǵan. Eger atalǵan buzýshylyq birinshi ret jasalyp, salyqtardyń eseptelýine ákep soqpasa, onda eskertý jasalady. Al eger osyndaı buzýshylyq eskertý jasalǵannan keıin bir jyl ishinde qaıtalansa, onda 3 AEK mólsherinde aıyppul salynady.