Japonııanyń bolashaq ımperatory Qazaqstannyń ekonomıkalyq saıasatyna baǵa berdi
Áńgime barysynda hanzada Narýhıto 1994 jyldyń sáýirinde Japonııaǵa resmı sapary kezindegi Qazaqstan Prezıdenti Nursultan Nazarbaevpen kezdesýin eske aldy. Bolashaq ımperator Qazaqstan Prezıdentiniń 2016 jylǵy Japonııaǵa resmı saparynyń qorytyndylaryn joǵary baǵalady. Sol sapar barysynda Memleket basshysy Japonııa Parlamentinde sóz sóılep, Hırosıma qalasyna barǵan bolatyn.
Elshi Erlan Baýdarbek-Qojataev hanzadany Prezıdent N. Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýynyń negizgi tustarymen tanystyrdy. Narýhıto Qazaqstannyń ekonomıkany ártaraptandyrýǵa jáne shıkizatqa táýeldilikten arylýǵa baǵyttalǵan saıasatynyń kóregendigin atap ótti.
Japon hanzadasy eki eldiń Uly Jibek joly arqyly jasaǵan tarıhı qatynastary jáne oral-altaı tilderi tobyndaǵy qazaq jáne japon tilderiniń baılanysy jaıly pikirin bólisti.
Qazaqstandyq dıplomat byltyr Astanada ótken «EKSPO-2017» halyqaralyq kórmesiniń qorytyndylary, Qazaqstannyń bilim, mádenıet jáne sport salalaryndaǵy jetistikteri jaıly áńgimeledi. Hanzada Narýhıto Astananyń 20 jyldaǵy damý qarqynyna, Nazarbaev Ýnıversıtetiniń qyzmetine asa qyzyǵyp otyrǵanyn aıtty.
Eske sala keteıik, taq murageri Narýhıto 2019 jylǵy 1 mamyrdan bastap Japonııa ımperatory bolady. Qazirgi ımperator Akıhıtonyń taqtan bas tartý rásimin 2019 jyldyń 30 sáýirinde ótkizý josparlanǵan. Japonııada ımperator 200 jyldan beri alǵash ret óz erkimen taqtan bas tartqaly otyr, buǵan deıin 1817 jyly ımperator Kokaký bılikti óz qalaýymen ulyna tapsyrǵan bolatyn.