Japonııanyń kúrish qory rekordtyq mınımýmǵa deıin tómendedi

<p>TOKIO. KAZINFORM &ndash; Japonııanyń kúrish qory týrıster aǵyny men ónimniń azaıýyna baılanysty sońǵy onjyldyqtaǵy eń tómengi rekorttyq deńgeıge deıin jetti, dep habarlaıdy<a href="https://www.theguardian.com/world/article/2024/jul/31/japan-rice-shortage-tourism-farming-crops" target="_blank" rel="noopener"> The Guardian.</a></p>

Japonııanyń Aýyl sharýashylyǵy, orman jáne balyq sharýashylyǵy mınıstrliginiń málimeti boıynsha, jeke sektordaǵy kúrish qory 2024 jyldyń maýsym aıynda 1,56 mıllıon tonnaǵa deıin azaıǵan, ótken jyldyń sáıkes kezeńimen salystyrǵanda 20 paıyzǵa ortaıdy. Bul derekter - jınaý bastalǵan 1999 jyldan bergi eń tómengi kórsetkish.

2023 jyly elde bolǵan aptap ystyq egindi jınap alýǵa keri áserin tıgizgen edi, nátıjesinde kúrish qory kúrt azaıyp ketti. Atap aıtqanda, ótken jyldyń qyrkúıek aıyndaǵy temperatýra Japonııada sońǵy 125 jylda baıqalǵan eń ystyq aı boldy.

Aýyl sharýashylyǵy mınıstrliginiń resmı ókili Hıroshı Itakýra kúrish qorynyń rekordtyq deńgeıge deıin tómendeýine birneshe faktorlar, sonyń ishinde joǵary temperatýra, sýdyń jetispeýshiligi jáne sheteldik týrıster aǵyny sebep bolǵanyn aıtty.

Ótken jyly kúrishke suranys kútpegen jerden 7 mıllıon tonnaǵa deıin ósti jáne jergilikti úkimet muny týrısterdiń kelýimen baılanystyrady: 2024 jyldyń birinshi jartysynda Japonııaǵa 17,78 mıllıon týrıst keldi, bul pandemııaǵa deıingi kezeńnen 1 mıllıonǵa kóp. Mınıstrliktiń málimetinshe, kúnine eki ret kúrish jeıtin týrıster suranystyń 51 myń tonnaǵa artýyna sebep bolǵan.

Jetispeýshilik saldarynan kúrishtiń baǵasy kóterildi. Keıbir sýpermarketter baǵany sharyqtatýǵa jáne satýdy shekteýge májbúr. Mundaı jaǵdaı jańa ónim satylymǵa shyqqanǵa, ıaǵnı qyrkúıekke deıin jalǵasady dep kútilýde.