Japonııada tolassyz jaýǵan jańbyr jeti adamnyń ómirin qıdy

<p>ASTANA. KAZINFORM — Japonııanyń Isıkava prefektýrasynda rekordtyq kólemde jańbyr jaýyp, jeti adam qaza tapty. Eki turǵyn iz-túzsiz joǵalyp ketken, taǵy tórteýimen baılanysý múmkin bolmaı jatyr. Bul týraly <a href="https://www3.nhk.or.jp/news/html/20240923/k10014589531000.html" target="_blank" rel="noopener">NHK</a> telearnasy habarlady. </p>

Eldegi kóshkin saldarynan 10 jumysshynyń Nakaıa týnnelinde qalyp, ekeýiniń qaza tapqany atap ótildi.

Sondaı-aq, kóshkin men ózen tasqynynan keıin qıraǵan turǵyn úıdiń astynan zardap shekkender tabyldy.

Telearnanyń habarlaýynsha, tabıǵı apattan negizinen Noto aýyly, Vadzıma jáne Sýdzý qalalary zardap shekken.

Sondaı-aq olar aǵymdaǵy jyldyń 1 qańtarynda bolǵan kúshti jer silkinisinen eń kóp zardap shekken eldi mekender. 21-22 qyrkúıekte Isıkava prefektýrasynyń jeti qalasy men eldi mekeninde 131 400 adam evakýatsııalanǵan.

Vadzıma men Sýdzý qalalarynda 21 qyrkúıekte rekordtyq jaýyn-shashyn tirkeldi. Atap aıtqanda, bir táýlikte Vadzımada 300 mm, Sýdzýda 200 mm jaýyn jaýǵan. Bul — 1975 jyldan beri baıqalǵan eń joǵary kórsetkish.