Japonııada Pfizer vaktsınasynyń tıimdiligi 85-96% dep baǵalandy

TOKIO. QazAqparat – Kıoto ýnıversıtetiniń mamandary Pfizer vaktsınasynyń tıimdiligi 85-96% dep baǵalady. Bul týraly QazAqparat Japonııanyń NHK telearnasyna silteme jasap habarlaıdy.

Kıoto ýnıversıtetiniń bir top zertteýshisi jazda zertteý júrgizip, koronavırýs juqtyrǵan 10 myńnan astam adamnyń málimetin taldap shyqqan. Infektsııaǵa shaldyqqandardyń kóp bóligi vaktsına almaǵan bolyp shyqty, bul japondyq mamandarǵa preparattyń tıimdiligin zertteýge jaqsy múmkindik berdi.

Zertteý barysynda Pfizer vaktsınasyn saldyrtqan 20-60 jas aralyǵyndaǵy er adamdar arasynda onyń tıimdiligi 89,6-93,4%, al 60 jastan asqan er adamdar arasynda - 94,7-96,9% deńgeıinde boldy. 20-60 jas aralyǵyndaǵy áıel adamdar arasynda preparat tıimdiligi 85,4%-91,8%, al 60 jastan asqandar arasynda – 92,6-96,1% bolǵan. Japon ǵalymdary zertteýdiń elde «delta» shtamynyń keńinen taralýy kezinde júrgizilgenin atap ótip, vaktsınanyń bul juqpaly nusqaǵa qarsy tıimdiligi óte joǵary, dep otyr. Qazirgi kezde Japonııa turǵyndarynyń kem degende 50 paıyzy koronavırýsqa qarsy vaktsınanyń eki túrli preparatyn saldyrtqan. Japonııada brıtandyq-shvetsııalyq AstraZeneca vaktsınasy jáne Amerıka men Germanııanyń Pfizer jáne BioNTech kompanııalary konsortsıýmynyń, sondaı-aq amerıkandyq Moderna kompanııasynyń vaktsınalary qoldanylýda.