Japonııada ondaǵan portty qalqymaly keýektastar massasy basyp qaldy

TOKIO. Kyodo-QazAqparat – Tokıo qalasy jaǵalaýyndaǵy aýdandar tamyz aıynda sýasty janartaýynyń atqylaýynan paıda bolǵan qalqymaly keýektastar massasynyń kelýin kútýde, dep habarlaıdy QazAqparat Kyodo agenttigine silteme jasap.

Bul materıal búgingi kúnge deıin ondaǵan balyq aýlaý porttaryn basyp, eldiń ońtústik-batysyndaǵy teńiz ómirine áserin tıgizip úlgergen.

Japonııanyń teńiz ortasyn, jer jáne tehnologııalaryn zertteý agenttiginiń sýperkompıýter arqyly jasaǵan boljamyna sáıkes, bul janartaýdan paıda bolǵan keýektastar massasy Tıba men Kanagava prefektýralaryndaǵy jaǵalaýǵa qarashanyń sońynda jetedi.

Tastar Tynyq muhıtyndaǵy Ogasavara araldar tizbegindegi Fýkýtoký-Okanaba jerasty janartaýynan atqylanǵan dep sanalýda. Janartaý 13 tamyzda qazirgi Japonııada baıqalyp otyrǵan janartaý atqylaýlarynyń ishinde eń irisi bolyp tabylady.

Keýektastar Tynyq muhıty sýlarynda qalqyp júrgen. Qazan aıynyń basynda bular janartaý atqylaǵan jerden 1000-nan astam shaqyrym qashyqtyqta, sondaı-aq kórshiles Kagosıma prefektýrasynan baıqalǵan.

Al qazan aıynyń sońynda tastar Japonııanyń batysyndaǵy Kotı prefektýrasynyń sýlarynda, Okınavadan soltústik-shyǵysqa qaraı shamamen 1000 shaqyrym jerde qalqyp júrgen.

Keýektas Okınava men Kagosımadaǵy balyq aýlaý sharýashylyǵy men týrızm salasyna orasan zor shyǵyn keltirdi.

Qalqymaly keýektas balyqshylardy jumys isteý múmkindiginen aıyryp otyr, sebebi materıal olardyń qaıyqtaryndaǵy qozǵaltyshtardyń jumysyna kedergi keltire alady.

Qolmen ońaı ýatyla alatyn jumsaq tastar qabaty sýǵa túsetin kún sáýlesin tolyq jaýyp, teńiz álemine de keri áserin tıgizip otyr.

Ortalyq úkimet zardap shekken balyqshylarǵa qarjylaı kómek kórsetip, tastardy sýdan jarym-jartylaı shyǵarý shyǵyndaryn óteýdi josparlaýda.