Japonııada Olımpıada uıymdastyrýshylary arasynan 15 adam koronavırýs juqtyrdy

TOKIO. TASS-QazAqparat – Tokıoda jazǵy Olımpıada oıyndaryna baılanysty adamdar arasynda koronavırýs ınfektsııasyn juqtyrýdyń keminde 15 jańa jaǵdaıy tirkeldi. Bul týraly senbide Olımpıadanyń uıymdastyrý komıteti málim etti, dep habarlaıdy QazAqparat TASS agenttigine silteme jasap.

Onyń arasynda Olımpıada nysandarynda jumys istep júrgen jeti qyzmetker, eki jýrnalıst jáne jarysty uıymdastyrýshy alty adam bar.

Sońǵylardyń biri – Tokıodaǵy olımpıada qalashyǵy aýmaǵynda vırýsty alǵashqy juqtyrǵan adam. Ol sheteldik quramanyń múshesi bolǵany belgili, biraq sportshy emes.

Qazirgi ýaqytta Japonııaǵa kelgen sportshylardan jáne birneshe elden kelgen komanda múshelerinen koronavırýs anyqtaldy.

Ol Izraıl, Ýganda jáne Serbııanyń atletterinen, sondaı-aq Nıgerııa men Reseı quramalarynyń qosalqy qyzmetkerlerinen tabyldy.

Tokıo Olımpıadasy 2020 jyldyń 24 shildesi men 9 tamyzy aralyǵynda ótýi tıis bolǵan.

Pandemııaǵa baılanysty jarystar bir jylǵa keıinge qaldy, endi ol 23 shildeden 8 tamyzǵa deıin ótedi.

Uıymdastyrýshylar oıyndardy sheteldik jankúıerlersiz ótkizýge sheshim qabyldady, sonymen qatar jergilikti kórermender Tokıony qosa alǵanda, alty japon prefektýrasynda olımpıada sharalaryna jiberilmeıdi.

Jarys bastalardan alty kún buryn Tokıoda jańa koronavırýstyń taralýyna baılanysty jaǵdaı qıyndady: Japonııa astanasynda anyqtalǵan jańa jaǵdaılardyń táýliktik ósimi myńnan asady.

12 shildeden bastap Tokıoda epıdemııalyq ahýaldyń nasharlaýyna baılanysty tótenshe jaǵdaı rejımi qaıtadan kúshine enip, 22 tamyzǵa deıin jalǵasady.