Japonııada nashar kóretin adamdarǵa arnalǵan navıgatsııa júıesi jasaldy

TOKIO. QazAqparat – Japonııanyń Ashirase kompanııasy kózi nashar kóretin adamdarǵa «serýendeý navıgatsııasy» júıesin oılap tapty, dep habarlaıdy QazAqparat New York Post-qa silteme jasap.

Qurylǵy aıaqqa kıiledi jáne smartfonǵa arnalǵan baǵdarlama arqyly qaı baǵytta qozǵalý kerek ekenin qoldanýshynyń aıaǵyna diril arqyly jetkizedi.

«Ashi» japon tilinen aýdarǵanda «taban», al «shirase» - eskertý, habarlama degendi bildiredi.

Qurylǵy bólshekteriniń biri aıaq-kıimniń ishine ornalasady, al ekinshi bóligi joǵarǵy jaǵyna bekitiledi, onda navıgatsııalyq baǵdarlama men akkýmýlıatordy iske qosýǵa arnalǵan mehanızm bar delingen kompanııa saıtynda.

Qurylǵy aqparatty GPS-ten alady – júrip bara jatqan qoldanýshyǵa qaıda jáne qashan burylý kerek nemese toqtaý keregi týraly diril belgi beriledi.

«Biz nashar kóretin adamdar «ózdiginen erkin júrip, álemdi ashady dep úmittenemiz» delingen kompanııa habarlamasynda.

Kompanııa qurylǵynyń zaǵıptarǵa emes, kózi nashar kóretinderge arnalǵanyn atap ótti. Qurylǵy kelesi jyldan bastap satylymǵa shyǵady degen jospar bar.