Japonııada Qazaqstandaǵy joǵary tehnologııalyq jobalar tanystyryldy

NUR-SULTAN. QazAqparat – Qazaqstan-Japonııa iskerlik keńesiniń múshelerine jáne iri japondyq kompanııalardyń ókilderine onlaın formatta jalpy somasy 5 mlrd AQSh dollarynan asatyn Qazaqstandaǵy birqatar júıe quraýshy jobalar tanystyryldy, dep habarlaıdy QR SІM baspasóz qyzmeti.

Іs-sharany QR SІM ınvestıtsııalardy tartýdyń úsh deńgeıli júıesi aıasynda Japonııanyń jańa táýelsiz memleketterimen saýda jónindegi qaýymdastyǵymen (ROTOBO) tyǵyz yntymaqtastyqta Qazaqstannyń Japonııadaǵy Elshiligi jáne «Qazaq Invest» AQ uıymdastyrdy.

Іskerlik keńestiń tóraǵasy, «Marubeni» korporatsııasy Basqarma tóraǵasynyń orynbasary Ichıro Takahara is-sharany asha otyryp, koronovırýstyq daǵdarystan tabysty shyǵý úshin Qazaqstan men Japonııa dástúrli salalarda ǵana emes, tsıfrlandyrý, qarjy jáne jasyl ekonomıkany qosa alǵanda, jańa taýashalarda saýda-ekonomıkalyq yntymaqtastyqty tereńdetýi qajettigin atap ótti.

Jobalar arasynda elektromobılder men batareıalar óndirisin qurý, sorǵy jabdyqtaryn, qubyr armatýrasyn jáne asınhrondy elektr qozǵaltqyshtaryn óndirý, robottardyń oqý-óndiristik keshenin, temirjol serippelerin jasaý jelisin salý, turmystyq tehnıka óndirisi, zaǵıp jáne nashar kóretin adamdarǵa arnalǵan tıflotehnıkalyq quraldardy ázirleý jáne óndirý jónindegi ǵylymı-tehnıkalyq ortalyǵy bar zaýyt, mys óndirý jónindegi gıdrometallýrgııalyq zaýyt salý jónindegi usynystar qyzyǵýshylyq týdyrdy.

Forýmǵa «Marubeni», «Sumitomo», «Mitsui & Co», «Toyota Tsusho», «Komatsu», «Sojitz», «Toyota Engineering», «Nissin», «Yokogawa Electric» kompanııalarynyń, sondaı-aq «Mizuho Bank» jáne «MUFG Bank» qarjy korporatsııalarynyń ókilderi qatysty.