Japonııada «Ál-Farabı ortalyǵy» ashyldy

NUR-SULTAN. QazAqparat - Qazaqstan Elshisi Erlan Baýdarbek-Qojataev, Tsýkýba ýnıversıtetiniń rektory Kesýke Nagata jáne ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov Japonııada «Ál-Farabı ortalyǵyn» saltanatty túrde ashty.

Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.

Іs-shara ǵalym jáne fılosof Ábý Nasyr ál-Farabıdiń 1150 jyldyǵyn merekeleýge arnalǵan aıtýly oqıǵa boldy, ol 2020 jyly QR Prezıdenti Qasym-Jomart Toqaevtyń tapsyrmasy boıynsha atalyp ótedi.

Ortalyq Gýmanıtarlyq, áleýmettik jáne jaratylystaný ǵylymdary salasyndaǵy birlesken ǵylymı-bilim berý jobalaryn iske asyrý, sondaı-aq ál-Farabıdiń entsıklopedııalyq murasyn ilgeriletý alańyna aınalýǵa tıis.

Ǵ.Mutanov óz sózinde ortalyqtyń ashylýy – uly oıshyldyń tulǵasyna degen joǵary qurmettiń belgisi jáne qazaq halqyna degen úlken dostyqtyń kórinisi ekenin atap ótti.

Onyń aıtýynsha, ortalyqtyń qyzmeti kásibı kadrlardy birlesip daıarlaýǵa, QazUÝ men Tsýkýba ýnıversıteti ǵalymdarynyń halyqaralyq reıtıngtik ǵylymı basylymdardaǵy jarııalanymdaryn ilgeriletýge baǵyttalatyn bolady.

K. Nagata Ortalyq Qazaqstan men Japonııa arasyndaǵy gýmanıtarlyq saladaǵy qarym-qatynastardy nyǵaıtýǵa yqpal ete otyryp, birlesken ǵylymı-bilim berý qyzmetin odan ári damytýǵa yqpal etetinin málimdedi. Rektor Japonııa ımperatorynyń taqqa otyrý rásimine qatysý maqsatynda 2019 jylǵy qazanda Tokıoǵa sapary barysynda QR Tuńǵysh Prezıdenti – Elbasy Nursultan Nazarbaevqa Qurmetti doktor ataǵyn berý Tsýkýba ýnıversıteti úshin úlken mártebe ekenin atap ótti.

Ortalyq sondaı-aq «Campus-in-Campus» baǵdarlamasy sheńberinde QazUÝ ókildigi retinde jumys isteıtin bolady.

Tsýkýba Japonııanyń jetekshi ulttyq ýnıversıtetteriniń biri, sondaı-aq álemdik deńgeıdegi bilim berý jáne zertteý ortalyǵy. Nobel syılyǵynyń laýreattary sany boıynsha eldiń joǵary oqý oryndary arasynda 4-shi oryn alady.