Japonııada Ál-Farabı ortalyǵy ashyldy

NUR-SULTAN. QazAqparat – «Kúnshyǵys elinde» alǵashqy ál-Farabı ortalyǵynyń ashyldy. Bul uly oıshyl ál-Farabıdiń 1150 jyldyǵyn merekeleý aıasynda Japonııa men Qazaqstan arasyndaǵy yntymaqtastyqty damytýda mańyzdy oqıǵa boldy, dep habarlaıdy QR SІM baspasóz qyzmeti.

Saltanatty rásim QR-dyń Japonııadaǵy Elshiliginiń qoldaýymen eń bedeldi joǵary oqý oryndarynyń biri – Tsýkýba ýnıversıtetinde ótti.

Ortalyq gýmanıtarlyq, áleýmettik jáne jaratylystaný ǵylymdary salasynda birlesken ǵylymı-bilim berý jobalaryn iske asyrý, Qazaq ulttyq ýnıversıteti esimin laıyqty ıelenip júrgen, kórnekti ǵalym jáne fılosof Ábý Nasyr ál-Farabıdiń altyn entsıklopedııalyq murasyn ilgeriletýdiń biregeı halyqaralyq alańyna aınalýǵa tıis.

«Ál-Farabı ortalyǵynyń ashylýy – oıshyl tulǵasyna degen joǵary qurmettiń belgisi ári qazaq halqyna degen úlken dostyqtyń kórinisi. Onyń bolashaǵy zor. Ortalyq kásibı kadrlardy birlesip daıarlaýǵa, QazUÝ men Tsýkýba ýnıversıteti ǵalymdarynyń halyqaralyq reıtıngtik basylymdardaǵy jarııalanymdaryn arttyrýǵa, sondaı-aq zertteý qyzmetin damytýǵa baǵyttalǵan. Ortalyqta qazaq tili oqytylyp, Qazaqstannyń tarıhy men mádenıeti tanystyrylatyn bolady», – dep atap ótti QazUÝ rektory Ǵalym Mutanov.

Meıdjı (1872) dáýirinen bastaý alatyn Japonııanyń jetekshi zertteý ýnıversıtetteriniń birindegi ál-Farabı ortalyǵynyń mıssııasy halyqaralyq arenada Qazaqstannyń ımıdjin nasıhattaýǵa jáne tanymaldyǵyn arttyrýǵa baǵyttalǵan. Sonymen qatar, negizgi seriktester adamzat órkenıeti tarıhynda baǵa jetpes ról atqarǵan uly fılosof ál-Farabıdiń murasyn zerdelep dáripteý maqsatynda eki ýnıversıtettiń áleýetin biriktirýge daıyn ekendikterin bildirdi.

Ortalyqtyń ashylýynda sóz sóılegen Tsýkýba ýnıversıtetiniń prezıdenti Nagata Kıosýke ál-Farabı ortalyǵynyń qyzmeti birlesken ǵylymı-bilim berý jumysyn odan ári damytyp órkendetýge yqpal etetinin, sondaı-aq Qazaqstan men Japonııa arasyndaǵy qatynastardy nyǵaıtýǵa úlken úles qosatynyn alǵa tartty.

Atap óterlik jaıt, ortalyqtyń ashylýy ál-Farabı atyndaǵy QazUÝ men Tsýkýba ýnıversıtetiniń Campus-in-Campus baǵdarlamasyn birlesip tabysty iske asyrýynyń jáne de kóp jylǵy jemisti yntymaqtastyǵynyń arqasynda múmkin boldy.

Qazaqstannyń atalmysh eldegi Elshisi Erlan Baýdarbek-Qojataev atap ótkendeı: «Bul is-shara eki ýnıversıtettiń seriktestiginiń ǵana emes, sondaı-aq elderimiz arasyndaǵy dostyq qarym-qatynastyń da sımvoly... Ál-Farabıdiń mereıtoıyn merekeleý – Qazaqstannyń jańa tarıhyndaǵy mańyzdy kezeń, óıtkeni onyń tulǵasy álemdik qoǵamdastyqqa bilim men ǵylymnyń, mádenıet pen ádebıettiń Uly dalada ejelden damyǵanyn aıshyqtaıdy».

Ál-Farabıdiń ıdeıalaryn dáripteı otyryp, QazUÝ álemniń 10 jetekshi joǵary oqý ornynda ashylǵan Ál-Farabıdiń ortalyqtary men murajaı-úıleri arqyly uly oıshyldyń ıdeıalaryn keńinen taratý arqyly maqsatty jumys júrgizýde. Ál-Farabıdiń mereıtoılyq jylynda AQSh, Reseı, Gretsııa, Rýmynııa, Albanııa, Malaızııa, Ózbekstan, Koreıa Respýblıkasy jáne Baltyq elderinde jańa ortalyqtar qurý jóninde ýaǵdalastyqqa qol jetkizildi.