Japonııa premer-mınıstri jurttyń alańdaýshylyǵyn basý úshin Fýkýsımadan alynǵan teńiz ónimderin ózi jep kórdi

TOKIO. QazAqparat – Japonııa premer-mınıstri Fýmıo Kısıda men Mınıstrler kabınetiniń birneshe ókili sársenbide Fýkýsıma prefektýrasy mańyndaǵy teńizde óndirilgen teńiz ónimderin jedi. Osylaısha, premer-mınıstr Fýkýsıma atom elektr stantsııasynan túsetin sýdyń adam densaýlyǵyna teris áseri týraly alańdaýshylyqty joıýǵa tyrysqan, dep habarlaıdy QazAqparat Kyodo-ǵa silteme jasap.

Japonııanyń ekonomıka, saýda jáne ónerkásip mınıstri, úkimettegi ıadrolyq saıasatqa jaýapty ıAsýtosı Nısımýra túski asqa Fýkýsıma jaǵalaýynda jınalǵan alabuǵa, kambala jáne segizaıaqtan jasalǵan sashımı berilgenin aıtty.

«Biz elde de, shetelde de AES mańyndaǵy teńizde aýlanǵan teńiz ónimderiniń qaýipsizdigi týraly habardar etýimiz kerek», - dedi ıA.Nısımýra Premer-mınıstr keńsesindegi kezdesýden keıin jýrnalısterge.

Ótken beısenbide Japonııa jergilikti balyq aýlaý kompanııalary men kórshi elderdiń qorshaǵan ortaǵa áseri týraly alańdaýshylyqqa qaramastan, qıraǵan Fýkýsıma atom elektr stantsııasynan tazartylǵan radıoaktıvti sýdy Tynyq muhıtyna aǵyza bastady.

Japon bıligi trıtııden basqa radıonýklıdterdiń kópshiligi tazartý protsesi kezinde joıylatynyn málimdedi.

Tsezıı men strontsıı sııaqty radıoaktıvti zattarǵa qaraǵanda trıtııdiń adam densaýlyǵyna zııany az, óıtkeni ol álsiz sáýle shyǵarady jáne denede jınalmaıdy deıdi sarapshylar.

Atom energııasy jónindegi halyqaralyq agenttik Japonııanyń sýdy shyǵarý ádisi álemdik qaýipsizdik standarttaryna sáıkes keletinin jáne adamdar men qorshaǵan ortaǵa radıatsııanyń áseri shamaly bolatynyn málimdedi.

Sýdyń muhıtqa tógilýine úzildi-kesildi qarsy bolǵan Qytaı birden Japonııanyń balyq ónimderin bas tartty.