Japonııa Qazaqstannyń 10 iri sheteldik ınvestory qataryna kiredi

NUR-SULTAN. QazAqparat - Qazaqstan Premer-Mınıstriniń orynbasary - Syrtqy ister mınıstri Muhtar Tileýberdi Japonııa Elshisi Tatsýhıko Kasaımen onyń dıplomatııalyq mıssııasynyń aıaqtalýyna oraı kezdesý ótkizdi, dep habarlaıdy QazAqparat.

M.Tileýberdi eki el arasyndaǵy saıası dıalogtyń, saýda-ekonomıkalyq, ınvestıtsııalyq jáne gýmanıtarlyq baılanystardyń údemeli damýyn qanaǵattanýshylyqpen atap ótti. Mınıstr japon tarapyna COVID-19 koronavırýsymen kúreste kórsetken kómegi úshin rızashylyǵyn bildirdi. Ol Qazaqstan men Japonııanyń ekonomıkalyq yntymaqtastyq jónindegi jeke sektorlary jáne úkimetaralyq komıssııasynyń 8-shi otyrysyn jaqyn arada ótkizýdiń mańyzdylyǵyn atap ótti.

«Japonııa 7 mlrd AQSh dollarynan astam somaǵa salymdardyń jalpy kólemi bar Qazaqstannyń 10 iri sheteldik ınvestorynyń qataryna kiredi», - delingen QR Syrtqy ister mınıstrligi málimetinde.

Aıta keteıik, jaqynda Elshi Tatsýhıko Kasaı óziniń dıplomatııalyq mıssııasy aıaqtalyp kele jatqanyn jáne Japonııaǵa oralatynyn jarııalady.

Óz málimdemesinde Elshi bıyl Qazaqstan Táýelsizdiginiń 30 jyldyǵy ekendigin aıta kele, 1991 jyldan bastap el halqy memleketti nyǵaıtý jolynda eńbek etkenin atap ótti.

«Osy 30 jylda Japonııa halyqaralyq qoǵamdastyqpen birlese Qazaqstannyń gúldenýin qoldap keldi jáne qoldaı beredi. Bul baǵytta Qazaqstan eleýli jetistikterge qol jetkizdi», - dep jazdy Tatsýhıko Kasaı.

Sonymen qatar ol Qazaqstan men Japonııa qundylyqtar boıynsha ortaq kózqarasqa ıe ekenin jáne ilgerileý jolynda birlese eleýli serpilis jasaı alatyndyǵyn sóz etti.

«Men aldaǵy ýaqytta da eki el arasyndaǵy qatynastardyń, dostyqtyń ári yntymaqtastyqtyń damýyna ózimniń kúsh-jigerimdi salatyn bolamyn», - dedi ol.

Onyń aıtýynsha, Japonııanyń jańa Elshisi Dzıýn ıAmada sáýir aıynyń sońynda Qazaqstanǵa keledi.