Japonııa elshiligi ımperator Narýhıtonyń týǵan kúnine oraı saltanatty qabyldaý ótkizdi

ASTANA. QazAqparat – Japonııanyń Qazaqstan Respýblıkasyndaǵy elshiligi Astana qalasynda Japonııanyń 126-shy ımperatory Narýhıtonyń týǵan kúnine oraı saltanatty qabyldaý ótkizdi, dep habarlaıdy QazAqparat tilshisi.

Іs-sharaǵa QR-da akkredıttelgen sheteldik dıplomattar, QR memlekettik organdary jáne mádenı orta ókilderi, sondaı-aq BAQ ókilderi qatysty.

Saltanatty sharanyń ashylý rásiminde Japonııanyń Qazaqstan Respýblıkasyndaǵy Tótenshe jáne Ókiletti Elshisi Djýn ıAmada trýba mýzyka aspabymen eki eldiń Memlekettik gımnin oryndap, quttyqtaý sóz sóıledi.

Elshi óz sózinde ótken jyly búkil adamzatqa COVID-19 indetimen qatar, ekonomıkalyq toqyraýlar, sondaı-aq qarýly qaqtyǵystar syndy syn-qaterler dóp kelgenin aıtty.

«Osyndaı jaǵdaıda Qazaqstan qazir kóptegen elderdiń eleýli nazary men tańdanysyn týdyryp, dúnıe júzindegi budan da mańyzdy oıynshyǵa aınalyp otyr», - dedi Djýn ıAmada.

Sonymen qatar, Japonııa Elshisi eki eldiń ótken jylǵy tabysty qarym-qatynasyn, eki jaqty joǵary deńgeıli saıası dıalog júrgizgenin eske saldy.

Saltanatty qabyldaýǵa arnaıy kelgen Qazaqstan Respýblıkasy Ekologııa jáne tabıǵı resýrstar mınıstrliginiń vıtse-mınıstri Dosbol Bekmaǵambetov qonaqtardy Japonııanyń Ulttyq kúni – Imperatordyń týǵan kúnimen quttyqtady. Ol óz sózinde Japonııa elimizdiń mańyzdy strategııalyq seriktesteriniń biri ekenin aıtty.

«Japon tarapymen parnıktik gazdar shyǵaryndylaryn azaıtý úshin ozyq tehnologııalar men ınfraqurylymdy taratý, sondaı-aq klımattyń ózgerýiniń saldaryn azaıtý jónindegi sharalardy júzege asyrý maqsatynda birlesken kredıtteý mehanızmin (JCM) qurý boıynsha belsendi jumys júrgizip kelemiz», - dedi ol.

Sóz sońynda QR Ekologııa jáne tabıǵı resýrstar mınıstrliginiń vıtse-mınıstri japon tarapyna tehnıkalyq koldaýy úshin alǵys aıta otyryp, Japonııa halqyna merekelik quttyqtaýyn jetkizip, zor densaýlyq pen tabys tiledi.

Foto avtordiki