Japon Premer-Mınıstrin jerleý rásimine 6 myńnan astam adam qatysty

ASTANA. QazAqparat – QR Syrtqy ister mınıstrliginiń resmı ókili Aıbek Smadııarov vedomstvo basshysy Muhtar Tileýberdiniń Japonııaǵa saparyn qorytyndylady, dep habarlaıdy QazAqparat tilshisi.

«Osy jyldyń 27 qyrkúıeginde Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi Japonııanyń burynǵy Premer-Mınıstri Sındzo Abeniń memlekettik jerleý rásimine qatysý úshin Japonııaǵa jumys saparymen baryp qaıtty. Resmı rásimge 6 myńnan astam adam, onyń ishinde Japonııanyń joǵary laýazymdy saıasatkerleri, Parlament depýtattary jáne 200-den astam el men halyqaralyq uıymdardyń sheteldik delegatsııalary qatysty. Qazaqstandyq delegatsııa basshysyn Japonııa Premer-Mınıstri Fýmıo Kıshıda qabyldady. Ol Prezıdent Qasym-Jomart Toqaevtyń, Qazaqstan Úkimeti men halqynyń atynan kóńil aıtty. Qazaqstan SІM basshysy marqum eks-Premer-Mınıstrdiń jubaıy Akıe Abege de kóńil aıtty», - dedi ol mınıstrlikte ótken aptalyq brıfıng barysynda.

Onyń atap ótýinshe, sapar aıasynda Qazaqstan SІM basshysy Japonııanyń Syrtqy ister mınıstri Eshımasa Haıashımen ekijaqty kezdesý ótkizdi. Taraptar ekijaqty jáne kópjaqty yntymaqtastyqty damytýdy talqylap, halyqaralyq ahýal men saýda-ekonomıkalyq máseleler boıynsha pikir almasty.

«Sonymen qatar, «Ortalyq Azııa + Japonııa» dıalogynyń Syrtqy ister mınıstrleri keńesiniń 9-shy otyrysyn osy jyldyń jeltoqsanynda jáne Ekonomıkalyq yntymaqtastyq jónindegi Qazaqstan-Japonııa úkimetaralyq jáne jeke sektorlar arasyndaǵy birlesken komıssııasynyń 8-shi otyrysyn 2023 jyly aqpanda Tokıo qalasynda ótkizý jóninde kelisildi», - dedi Aıbek Smadııarov.

Foto: Foto:Franck Robichon / Getty Images