«Japon men AQSh-tyń ǵalymdary «Alash» dep alyp-ushyp tur» - respýblıkalyq basylymdarǵa sholý
Osy jyldyń kókteminde «Innovatsııalyq Qazaqstan - 2020» forýmynda Elbasy Nursultan Nazarbaev 2015 jyly ınnovatsııalyq kórsetkishter jóninen Qazaqstan ÁEF Básekege qabilettiliktiń jahandyq ındeksiniń reıtınginde 2015 jyly 101-orynnan 65-ke, 2020 jyly 50-ge bir-aq sekirýi qajet degen pármendi paıymyn jetkizgen bolatyn. Soǵan oraı «Aıqyn» basylymy «Innovatsııa - senimdi strategııa» degen taqyrypta Qazaqstannyń jańa ınnovatsııalyq saıasatynyń alǵa qoıyp otyrǵan mindetteriniń oryndalý barysy jaıynda jazylǵan kólemdi maqala usynyp otyr.
«Bıylǵy jyly da, 2012 jyly da bıýdjet kirisi qazirgi jospardaǵydan áldeqaıda mol bolmaq», - dep habarlaıdy «Aıqynnyń» «Bıýdjet túzeletin syńaıly» dep atalatyn kelesi bir materıalynda.
Maqalada avtor bıýdjettik kiristerin ulǵaıtatyn negizgi 8 faktordy jáne óndiris kóleminiń eń kemi nomınaldyq on paıyz ósimin qamtamasyz etetin 5 shartty keltire ketip, shyǵys bóligin tolyqtyrý qajettigine toqtalady.
«Bıylǵy jyl ǵana emes, aldaǵy úsh jyl biz úshin qolaıly kezeń bolatyn syńaıly. Odan ári dál osyndaı qolaıly jaǵdaı bola ma, joq pa ony ýaqyt kórseter. Sondyqtan qolaıly kezeńde jınalǵan qarajatty jan-jaqqa shashyratpaı, negizgi basty qajettilikterge jumsaı alsaq, utysymyz kóp bolmaq. Biz bul arada Elbasymyzdyń taǵy da bıýdjettikter kirisin kóbeıtý sekildi naqty usynysy bolý múmkindigin de esten shyǵarmaımyz. Qysqasy, Qazaqstan úshin qarqyndy damýdy jalǵastyratyn kezeń týyp tur. Ony utymdy paıdalana alsaq qana odan arǵy damýymyz irkilissiz bolmaq», - delingen saraptamalyq maqalada.
«Alash aınasy» basylymynyń búgingi sanynda «Japon men AQSh-tyń ǵalymdary «Alash» dep alyp-ushyp tur» atty maqala jarııalandy. Alashtyń arysy Álıhan Bókeıhannyń týǵanyna bıyl - 145 jyl. Maqala avtory, atalmysh mereıtoı qarsańynda «Nur Otan» partııasynyń bastamasymen qyrkúıektiń 13-i kúni ótetin Álıhan Bókeıhannyń 145 jyldyǵy men Táýelsizdigimizdiń 20 jyldyǵyna arnalǵan «Alash muraty jáne táýelsiz Qazaqstan» taqyrybyndaǵy halyqaralyq ǵylymı-tájirıbelik konferentsııanyń uıymdastyrylatynyn jazady.
«Ekpin túsire aıtatyn dúnıe - konferentsııa oblystyq ne respýblıkalyq deńgeıde emes, halyqaralyq deńgeıde ótedi. Sebebi Alash pen Álıhandy biz óz deńgeıinde qadirleı bilmesek te, qadirine jetip júrgen sheteldik ǵalymdar bar eken. Sonyń biri - Japonııadaǵy Hokkaıdo ýnıversıteti janyndaǵy Slavıan zertteý ortalyǵynyń professory Tomohıko Ýıama. Japondyq ǵalym L. Gýmılev atyndaǵy Eýrazııa ulttyq ýnıversıtetinde ótetin konferentsııada «Á. Bókeıhan men onyń dáýirlesteriniń HH ǵasyrdyń basyndaǵy halyqaralyq ahýaldy uǵynýy týraly» degen taqyrypta baıandama jasaımyn dep at-kóligin saılap otyr eken», - delingen maqalada.
Sonymen qatar gazettiń jazýynsha, bul jıynda AQSh-tyń Vashıngton shtatyndaǵy Karnegı qorynyń ǵylymı qyzmetkeri, Orta Azııa elderindegi amerıkalyq sarapshy Marta Brıl Olkott ta Alash arysynyń topyraǵyna kelip, bir tebirensem dep otyrǵan kórinedi. Jalpy, konferentsııaǵa elimizdiń barlyq óńirlerinen 100-den astam zertteýshi kelmek.
«Qazaqstandyq alpınıster Maqsut Jumaev pen Vasılıı Pıvtsov K2 shyńyn baǵyndyryp, kezekti erlikterine qol jetkizdi», - dep habarlaıdy «Kazahstanskaıa pravda» gazeti «Álemniń barlyq segizmyńynshylary» atty maqalada. Óz mansaptarynda birneshe ret shyqsa da, atalǵan shyńdy baǵyndyra almaı kelgen muzbalaq jigitterimiz 23 tamyz kúni kópten bergi maqsattaryna jetti. «Atalmysh shyń ańyzǵa aınalǵan alpınısterdiń baǵyndyrǵan 14-ushar basy. Qaharmandardyń twitter-degi paraǵyna jazylǵan kóptegen quttyqtaýlarǵa el Premer-Mınıstri Kárim Másimov te qosyldy», - delingen maqalada.