Japon kompanııasynyń Aıǵa alǵashqy sapary sátsiz aıaqtaldy

ASTANA. QazAqparat - Japondyq iSpace kompanııasy Aıǵa ushýy sátsiz aıaqtalǵanyn málimdedi, dep habarlaıdy QazAqparat VVS-ge silteme jasap.

Ol barlaý robotyn Aıǵa sátti qondyrǵan alǵashqy jekemenshik kompanııa bolatynyna úmittengen edi.

Tokıoda ornalasqan iSpace kompanııasy qondyrǵysh modýldiń Aıǵa zertteý úshin jol talǵamaıtyn kólik, sondaı-aq kólemi tennıs dobyndaı barlaý robotyn qondyrmaq bolǵan.

Alaıda japondyq Hakuto-R modýlimen baılanys ol Aıǵa qonýǵa birneshe mınýt qalǵanda úzilgen.

«Baılanys úzildi, sondyqtan biz Aı betine qona almadyq dep shamalaýǵa májbúrmiz», - dedi iSpace bas dırektory Takeshı Hakamada.

Injenerler baılanystyń úzilý sebebin anyqtaý ústinde.

Hakamadanyń aıtýynsha, ǵarysh kemesi ótken jyldyń jeltoqsanynda Florıda shtatyndaǵy Kanaveral múıisinen SpaceX zymyranymen ushyryldy jáne on ǵaryshtyq mıssııanyń segizin aıaqtady.

Onyń nátıjesi iSpace-tiń aı modýlin qondyrýǵa kelesi áreketin daıyndaýǵa qyzmet etedi.

Ol 2024 jylǵa josparlanǵan. Buǵan arnaıy keme salynyp jatyr.

Eger Hakuto-R modýliniń qonýy sátti ótse, Japonııanyń ǵarysh baǵdarlamasy qosymsha serpin alar edi.

Búgingi kúnge deıin tek AQSh, KSRO jáne Qytaı ǵana Aı betine ǵarysh apparattaryn jumsaq qondyrǵan, olardyń baǵdarlamalaryn memleket qarjylandyrdy.

Úndistan men Izraıldiń jekemenshik kompanııasynyń áreketi de sátsiz aıaqtaldy.