Japon elshisi: Qazaq tilin úırenip júrmin

ASTANA. QazAqparat - Japonııa Elshisi Tatsýhıko Kasaı qazaq tilin úırenýge den qoıdy. Bul týraly Elshi Aqordada Elbasy Nursultan Nazarbaevqa senim gramotasyn tapsyrǵannan keıin aıtty, dep habarlaıdy QazAqparat tilshisi.

«Men Qazaqstandaǵy dıplomatııalyq mıssııamnyń bastalýy zor qurmet ári qýanysh. Japonııa men Qazaqstannyń tarıhı úlken qarym-qatynasy bar. Osy ýaqyt aralyǵynda elderimiz barlyq saladaǵy jan-jaqty qarym-qatynasty damytty. Elshi retindegi meniń mıssııam - osy qarym-qatynasty odan ary damytý jáne oǵan bar kúshimdi salamyn», - dedi Elshi BAQ ókilderine bergen suhbatynda.

Sonymen qatar Tatsýhıko Kasaı qazaq tilin úırenýge den qoıyp júrgendigin de atap ótti.

«Qazaqstandy, qazaq halqyn, órkenıeti men salt-dástúrin jete túsiný úshin qazaq tilin úırengim keledi. Qazirgi ýaqytta til úırenýmen aınalysyp ta júrmin», - dedi ol.

Aıta keteıik, senim gramotasyn qabyldaý rásiminde Elbasy Nursultan Nazarbaev Japonııamen jan-jaqty dıalogty damytý Qazaqstan syrtqy saıasatynyń basym baǵyttarynyń biri ekendigin atap ótken bolatyn.

«Biz japondyq kompanııalardyń Qazaqstan naryǵyna atsalysýyna múddelimiz, barynsha jaǵdaı jasaýǵa daıynbyz. Oǵan eki eldiń arasynda tikeleı áýe reısterin ashý zor septigin tıgizedi", - degen edi Memleket basshysy.