Janjal shyǵaryp, otbasynyń berekesin alatyndar kóshe sypyrýy múmkin

ASTANA. QazAqparat – Elimizde turmystyq zorlyq-zombylyqqa qarsy kúresti kúsheıtý is-sharalary ázirlendi. Bul týraly Úkimet otyrysynda QR Іshki ister mınıstri Marat Ahmetjanov aıtty, dep habarlaıdy QazAqparat tilshisi.

«Memleket basshysynyń tapsyrmasymen turmystyq zorlyq-zombylyqqa qarsy kúresti kúsheıtý sharalary ázirlendi. Birinshisi – mundaı faktilerdi tirkeý boıynsha «ótinish berý sıpatynan anyqtaý sıpatyna» kóshý. Bul – polıtsııaǵa jábirlenýshiniń ótinishi bolmasa da, ákimshilik is-júrgizýdi bastaýǵa múmkindik beredi. Sońǵy sheshimdi sot qabyldaıdy», - dedi mınıstr.

Onyń atap ótýinshe, ekinshisi – taraptardyń tatýlasýyna talapty kúsheıtý. «Janjalqoı» birinshi rette ǵana sotta tatýlasa alady.

Al qaıtalansa mundaı quqyq alynyp tastalady. Bul zardap shekkenderge psıhologııalyq qysymdy toqtatýǵa múmkindik beredi.

«Úshinshisi – otbasylyq-turmystyq saladaǵy quqyq buzýshylyqtar boıynsha jazany qatańdatý. Qaıtalanǵan quqyq buzýshylyqtar úshin ákimshilik qamaýǵa alýdyń merzimin uzartýdy usynamyz. Tórtinshisi – ol, ózderińiz bilesiz, Konstıtýtsııanyń jańa ózgeristerine sáıkes qoǵamdyq jumystardy sot qaýlysymen de taǵaıyndaýǵa ruqsat etildi. Osynyń aıasynda «eskertý» sııaqty jazany «qoǵamdyq jumystarǵa» aýystyrýdy usynamyz. Bul quqyq-buzýshy úshin zańdy buzbaýǵa jetkilikti motıvatsııa bolady dep sanaımyz. Qazirgi ýaqytta Ádilet mınıstrligi qoǵamdyq jumystardy zańnamalyq retteý máselesin pysyqtap jatyr», - dedi Marat Ahmetjanov.

Mınıstrdiń sózine qaraǵanda, besinshisi – eń jıi jasalatyn qylmystar boıynsha «otbasylyq-turmystyq qatynastaǵy adamǵa qatysty» degen qosymsha saralaý belgisi engiziledi.