Janýardyń ólimine ákelgen qatygezdik úshin qandaı jaza eskerilgen

NUR-SULTAN. QazAqparat – Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine janýarlarǵa jaýapkershilikpen qaraý máseleleri boıynsha ózgerister men tolyqtyrýlar engizý týraly» zań jobasyn talqylaý kezinde qandaı jaýapkershilikter qarastyrylǵany aıtyldy, dep habarlaıdy QazAqparat tilshisi.

Atap aıtqanda, jalpy otyrysta «Janýarlarǵa jaýapkershilikpen qaraý týraly» zań jobasy birinshi oqylymda maquldandy.

Zań jobasynyń negizgi erejelerin iske asyrý úshin qoldanystaǵy zańnamalyq aktilerge ózgerister men tolyqtyrýlar engizý usynyldy.

Atap aıtqanda, túzetýler Qylmystyq kodeksiniń 316-babyna sanktsııalardy ulǵaıtý arqyly janýarlarǵa qatygezdikpen qaraǵany úshin qylmystyq jaýapkershilikti kúsheıtýge baǵyttalǵan.

«Birinshi bólimde janýardyń mertigýine ákep soqqan qatygezdigi úshin 120 aılyq eseptik kórsetkishke deıin aıyppul jáne 30 táýlikke deıin qamaýǵa alý kózdelgen. Ekinshi bólimde janýardyń ólimine ákep soqqan qatygezdigi úshin 200 aılyq eseptik kórsetkishke deıin aıyppul jáne 50 táýlikke deıin qamaýǵa alý eskerilgen», - dedi Ekologııa, geologııa jáne tabıǵı resýrstar mınıstri Serikqalı Brekeshev.

«Jergilikti memlekettik basqarý jáne ózin-ózi basqarý týraly» Zańda oblystardyń, respýblıkalyq mańyzy bar qalalardyń, astananyń máslıhattarynyń úı janýarlaryn esepke alý, jansyzdandyrý tártibin bekitý jónindegi quzyreti keńeıtildi.

«Veterınarııa týraly» Zańda jergilikti atqarýshy organdardyń janýarlardy jansyzdandyrý tártibin aıqyndaý, aýlaýǵa jáne jansyzdandyrýǵa jatatyn janýarlardyń tizbesin bekitý jónindegi quzyreti keńeıtildi.

«Janýarlar dúnıesin qorǵaý, ósimin molaıtý jáne paıdalaný týraly» Zańda birkelki uǵymdar belgilengen jáne baqylaý-qadaǵalaý fýnktsııalary máseleleri jónindegi zańnama jetildirilgen.