Jansyn, qırasyn, formalaryńdy sheshińder- Shymkentte buzaqylar órt sóndirýshilerge osyndaı talap qoıǵan

ShYMKENT. QazAqparat- Shymkentte bolǵan jappaı tártipsizdik kezinde buzaqylar órt sóndirýshilerdiń jumysyna kedergi keltirip, ózderine qarsy shabýyldaǵan, dep habarlaıdy QazAqparat tilshisi.

Shymkent qalasy TJD Órt sóndirý jáne avarııalyq-qutqarý jumystary qyzmetiniń bastyǵy, azamattyq qorǵaý podpolokovnıgi Qýanysh Arslanov alańdaǵy shyqqan órtterdi jeke quramnyń qıyndyqqa qaramaı, qalaı sóndirgenderin aıtyp berdi.

«Sóndirmeısińder, jansyn, qırasyn, ózderiń formalaryńdy sheshińder de biz jaqqa ótińder» degen buzaqylardyń talaptaryna jeke quram kónbedi. Biraq antyna adal azamattyq qorǵaý organynyń qyzmetkerleri esh toıtarysqa qaramastan óz mindetterin atqaryp, sońyna deıin kúresti» -deıdi ol.

Qalalyq ákimshiliktiń aldynda alǵashqy kólik órtengende órt sóndirýshiler birden sóndirmek bolǵan. Kólikterimen oqıǵa ornyna jaqyndaǵanda aspannan tas qarsha borapty. Sondaı-aq qoldarynda qarýlary bar bir top adam shabýyldap, ómirlerine qaýip tóndirgen.

Jeke quramnyń qaýipsizdigin qamtamasyz etý úshin birge júrgen basshylyq shıelenisti barynsha toqtatyp, buzaqylarmen kelissóz júrgizgen.

«Otqa oranǵan kólik ákimshilik ǵımaratqa tym jaqyn ornalasqan edi. Sondyqtan kópqabatty ǵımaratqa órt tarap ketý qaýipi týyndady. Buzaqylarǵa toıtarys bere júrip, der kezinde sóndirdik. Keıinnen jeńil kólikter, avtobýstar órtke orandy. Tipti mereke kezinde qoıylǵan jasyl shyrshaǵa deıin órt qoıyldy. Al «Kórme ortalyǵy» órtke oranǵan kezde adamdardyń kóptiginen ǵımaratqa ótý qıyn boldy. Buzaqylar da órtti sóndirýge jol bermeıtinderin aıtty. Alaıda, polıtsııa departamentiniń arnaıy jasaǵy kómekke keldi. Osylaısha aýmaǵy 260 sharshy metrdi quraǵan ortalyqtaǵy aýqymdy órt sóndirildi»-deıdi Q.Arslanov.

Jalpy jappaı tártipsizdikten 5 órt sóndirý avtokóligine tas tıgen.