Janseıit Túımebaev: Jastar - qoǵamdaǵy qozǵaýshy kúsh
Bul týraly óńir basshysy Janseıit Túımebaev búgin Shymkent qalasynda ótken «Básekege qabiletti - jastar» atty oblystyq jumysshy jastar forýmynda aıtty, dep habarlaıdy OQO ákiminiń baspasóz qyzmeti.
Jastarmen tildesý barysynda ákim táýelsizdik jyldary on myńdaǵan jas álemniń mańdaıaldy ýnıversıtetterinde «Bolashaq» baǵdarlamasymen bilim alǵanyn, onyń ishinde 400-ge jýyq ońtústikqazaqstandyqtyń da bar ekenin atap ótti.
- Al jańa býynǵa tyń serpilis berip keletin «Serpin» baǵdarlamasymen 17 myńǵa jýyq stýdent Soltústik aımaqtardaǵy kásiptik jáne joǵary oqý oryndarynda oqyp jatyr. Ondaǵy respýblıkalyq granttyń 50 paıyzy oblys jastarynyń enshisinde. Osylaısha, óńir jastary Elbasymyzdyń tikeleı bastamasymen júzege asyrylǵan jobaǵa barynsha qoldaý bildirýde. Olardyń ishinen 2016-2017 jyldary tehnıkalyq jáne aýyl sharýashylyǵy mamandyqtary boıynsha oqýyn bitirgen 346 stýdenttiń 189-y turaqty jumysqa qabyldandy»,-dedi ákim.
Jyl aıaǵynda barlyq saladaǵy jumystardy qorytyndylap, saraptama jasaý dástúrge aınalǵanyn aıtqan aımaq basshysy jyl sońynda oblystaǵy jumysshy jastardyń basyn qosyp, eńbekshi jastardy qoǵamǵa tanytýdy jón kórdik dedi.
«Elbasymyz Nursultan Ábishuly Nazarbaev óziniń «Bolashaqqa baǵdar: rýhanı jańǵyrý» baǵdarlamalyq maqalasynda «Jańǵyrýdyń eń basty sharty - ulttyq kodyńdy saqtaı bilý» dep atap ótken bolatyn. Olaı bolsa eldigimizdi saqtap, ulttyq kodymyzdy jańǵyrtý jolynda aıanbaı eńbek etýge shaqyramyn. Sizderge tek eńbekte ǵana emes, Táýelsiz elimizdiń maqtanyshyna aınalyp, ómirdiń barlyq salalarynda úlken jetistikterge jetýlerińizge shyn júrekten tilektespin»,-degen oblys ákimi jumysshy jastarǵa alǵysyn bildirdi.